ءۇش اي كۇتتىرگەن ديماشتىڭ فاناتتارى اقتوبەگە كەلمەيدى
«ەكسپو-2017» حالىقارالىق كورمەسى اياسىندا قىتايلىق تۋريستەر اقتوبەگە كەلىپ، ءانشى ديماش قۇدايبەرگەننىڭ تۋعان جەرىنە ساياحات جاساۋى ءتيىس ەدى. ءانشىنىڭ اناسى سۆەتلانا ايتبايەۆا وبلىستىق ءماسليحات سەسسياسى كەزىندە تۋريستىك مارشرۋتتىڭ ازىرلىگىن سۇراعان بولاتىن.
ال اقتوبە وبلىستىق سىرتقى بايلانىستار جانە تۋريزم باسقارماسىنىڭ باسشىسى ەرمەك كەنجەحان ۇلى 2 مىڭ تۋريست كەلۋگە ۇسىنىس جاساعانىن ايتىپ، ىشكى تۋريزمدى دامىتىپ جۇرگەن فيرماعا ارنايى مارشرۋت ازىرلەۋدى تاپسىردى. تۋرمارشرۋتقا ديماش قۇدايبەرگەن وقىعان ورتا مەكتەپ، مۋزىكالىق كوللەدجى مەن وبلىستىق فيلارمونيا كىردى.
ءۇش اي بويى قىتايلىق ارىپتەستەرىنەن حابار كۇتكەن جەرگىلىكتى تۋريستىك فيرما ديماش قۇدايبەرگەنگە ارنالعان مارشرۋتتى توقتاتىپ، ىشكى تۋريزمگە باعىتتالعان جۇمىستارىن جانداندىردى.
«ديماش قۇدايبەرگەنگە ارنالعان تۋريستىك مارشرۋت ارنايى دايىندالدى. ءۇش اي كۇتتىك. قىتايلىق ارىپتەستەردەن حابار بولمادى، ەندى تۋريستەردىڭ كەلمەيتىنى بەلگىلى بولدى. قازىرگى كەزدە ىشكى تۋريزمدى دامىتۋ باعىتىن قايتا قولعا الدىق. ىرعىز، بايعانين اۋداندارىنا بارامىز»، - دەدى «زەرە تۋر» تۋريستىك فيرماسىنىڭ ديرەكتورى بوتاگوز كرامبايەۆا.
ايتا كەتەيىك، قىتايلىق تۋريستەر كەلەدى دەپ دايىندالعان جەرگىلىكتى بيلىك ارنايى گيد- ەكسكۋرسوۆودتاردى دا دايىندادى. قىتاي ءتىلىن بىلەتىندەر باسقا ايماقتاردان حابارلاسىپ، ءوز قىزمەتتەرىن ۇسىندى.
اۆتور: التىناي ساعىندىقوۆا