استاناداعى مارافونعا ءبىر وتباسىنىڭ ءۇش بۋىنى تولىق قاتىسۋدا
رۋسلان ابدۋسالاموۆ ەسىمدى استانا قالاسىنىڭ تۇرعىنى حالىقارالىق شاراعا قولداۋ ءبىلدىرۋ ءۇشىن تولىق وتباسىمەن كەلىپ وتىر. مارافونعا قاتىساتىن وتباسىنىڭ ەڭ ۇلكەنى - اكەسى ابدۋسالامنىڭ جاسى 60 تا بولسا، 4 جاستاعى ەڭ كىشى ۇلى 2017 مەترگە باعىن سىناماق ەكەن.
«مۇندا ەكى بالامدى قوسقاندا، 15 ادام بولىپ كەلدىك. ەڭ كىشكەنتاي بالام 4-تە. ۇلكەنى 7 جاستا. ۇلكەن ۇلىم ءاليحان 7 جاسقا دەيىنگى بالالار اراسىندا جيۋجيسۋدان الەم چەمپيونى. جاقىندا عانا ابۋ-دابيدە وتكەن سايىستان ءبىرىنشى ورىن الىپ كەلدى. ءوزىم جيۋجيتسۋ سپورت ءتۇرى بويىنشا سپورتتىق پروموۋتەرمىن. كۇرەستەن سپورت شەبەرىمىن. ءبىز جىل سايىن ءبىر وتباسى بولىپ مارافونعا قاتىسامىز. جاسى الپىسقا تولىپ وتىرعان اكەم ابدۋسالام، انام سارسەنگۇل، ايەلىم رۋفينا، مەن جانە ۇلدارىم بۇگىن توپ جارۋ ءۇشىن بارىن سالادى»، - دەيدى رۋسلان ابدۋسالاموۆ.
ۇلگىلى جانۇيا وزدەرىنىڭ باستاماسىمەن وتاننىڭ وتباسىدان باستالاتىنىن دالەلدەپ كەلىپ وتىر.
«وتباسىمىز ءاردايىم سپورتتىق قالپىمىزدى ساقتاپ جۇرگەن ادامدارمىز. وسى جارىسقا دايىنبىز دەپ ايتا الامىن. ۇلكەندەر10 شاقىرىمعا جۇگىرەمىز. جۋىقتا عانا الماتىداعى مارافونعا قاتىستىق. ماقساتىمىز ەلىمىزدە ۇيىمداستىرىلىپ جاتقان اۋقىمدى شاراعا اتسالىسىپ، قولداۋ ءبىلدىرۋ. مەن ءوزىم قازاقستان حالقى اسامبلەياسىنىڭ مۇشەسى رەتىندە وسىنداي شارالاردان قالماۋعا تىرىسامىن. ءبىز ءوزىمىز كوپ ۇلتتى وتباسى رەتىندە وتانىمىزدى قولداعىمىز كەلەدى»، - دەيدى رۋسلان.
ەسكە سالا كەتسەك، بۇگىن استانادا شانحاي ىنتىماقتاستىق ۇيىمى مەن ازياداعى ءوزارا ىقپالداستىق جانە سەنىم شارالارى جونىندەگى كەڭەستىڭ حالىقارالىق مارافونى ءوتىپ جاتىر.