كيم چەن ىندى ك ن ب اگەنتى كۇزەتە مە؟
بۇل ارنايى وتريادتى ا ق ش پەن وڭتۇستىك كورەيانىڭ جالدامالى جەندەتتەرى ۇيىمداستىرۋى مۇمكىن. رەسمي پحەنيان بۇل ارەكەتتەن تولىق حاباردار. سوندىقتان دا بولار، سولتۇستىك كورەيانىڭ تەلەگراف اگەنتتىگى كەشە كيم چەن ىنعا قاستاندىق جاسايتىن ۇيىمداستىرۋشىلار مەن وعان بەلسەندى قاتىسۋشى توپتى اتادى.
ولاردىڭ ىشىندە وڭتۇستىك كورەيا ۇلتتىق بارلاۋ قىزمەتىنىڭ باسشىسى لي بەنحو، ءبولىم باسشىسى حان گان، وڭتۇستىك كورەيا بارلاۋ قىزمەتىنىڭ اگەنتى چو گيچحول، سونىمەن قاتار Qingdao Nazca كومپانياسىنىڭ باسشىسى بار. وسىعان وراي، رەسمي پحەنيان اتالعان ادامدار قانداي دا ءبىر ەلدىڭ تەرريتورياسىندا جۇرگەن بولسا، ولاردى ۇستاپ سولتۇستىك كورەيا بيلىگىنە بەرۋدى ۇسىنادى.
ءبىراق بۇل تاپسىرما ورىندالا قويار ما ەكەن؟! دەسەك تە، پحەنياننىڭ كۇدىكتەنەتىندەي ءجونى بار. سولتۇستىك كورەيانىڭ ۇلتتىق قاۋىپسىزدىك جونىندەگى مينيسترلىگى وتكەن اپتادا سولتۇستىك كورەيا ليدەرىنە ا ق ش پەن وڭتۇستىك كورەيا تاراپىنان «بيوحيميالىق قارۋدىڭ» كومەگى ارقىلى قاستاندىق جاسالماق بولعانىن حابارلادى.
قازىر جاس ديكتاتوردىڭ قاۋىپسىزدىگىن كۇشەيتۋ ءۇشىن بارلىق شارالار جاسالىنىپ جاتقانعا ۇقسايدى. ءتىپتى جاپونيانىڭ ءبىرقاتار بۇقارالىق اقپارات قۇرالدارى «كەزىندە كەڭەس وداعىنىڭ قاۋىپسىزدىك قىزمەتىنىڭ مەكتەبىنەن وتكەن 10 اگەنتى سوڭعى ايلاردا سولتۇستىك كورەيادا بولىپ، كيم چەن ىندى قالاي كۇزەتۋدىڭ جولدارىن ۇيرەتتى» دەپ جازدى.
راسىندا دا ا ق ش پەن وڭتۇستىك كورەيانىڭ بارلاۋ قىزمەتى سولتۇستىك كورەيانىڭ پرەزيدەنتى كيم چەن ىننىڭ كوزىن قۇرتۋ تۋرالى ارنايى جوبا جاسالعانىن جوققا شىعارىپ وتىرعان جوق.
بەرىك بەيسەن ۇلى
«ايقىن» گازەتى