سينگاپۋرلىق عالىمدار جۇرەك اۋرۋىن ەمدەيتىن ءادىس ويلاپ تاپتى

استانا. قازاقپارات -  سينگاپۋرلىق عالىمدار ادام ومىرىنە ماڭىزدى مەديتسينالىق جاڭالىق ويلاپ تاپتى. ەندى جۇرەك بۇلشىق ەتىنىڭ تالشىقتارى زاقىمداناتىن بولسا، قايتادان ءوزىن- ءوزى قالپىنا كەلتىرە الادى.

جۇرەكتىڭ تەرىدەن ايىرماشىلىعى سول. ياعني ەگەر تەرى زاقىمدانسا، دانەكەر كلەتكالار جىلدام ءبولىنىپ، جارانىڭ ورنى تەز ءبىتىپ كەتەدى. ال جۇرەكتە مۇنداي قاسيەت جوق، ونىڭ بۇلشىق ەتى جارالانسا، قايتا بىتپەيتىن. كوبىنە مۇنداي جاعداي جۇرەك تالماسىنا شالدىققاندا كەزدەسەدى.

سوندىقتان دا جۇرەك اۋرۋى - الەمدەگى ادام ولىمىنە باستى سەبەپتەردىڭ ءبىرى. الايدا سينگاپۋرلىق عالىمدار جۇرەك كلەتكالارىنىڭ ءبولىنۋىن جاقسارتاتىن ريبونۋكلەين قىشقىلىن انىقتادى.

رودجەر فۋ، سينگاپۋر گەنەتيكا ينستيتۋتىنىڭ پروفەسسورى:

 - جۇرەك بۇلشىق ەتىنىڭ قايتا قالپىنا كەلۋىنە ەندى مۇمكىندىك بار. ويتكەنى كلەتكالاردىڭ ءبولىنۋىن ارتتىراتىن نەگىزگى مولەكۋلانى تاپتىق جانە وعان «جىرلاعان جۇرەك» دەگەن ات بەردىك. ەگەر وسى مولەكۋلانى ازايتىپ نە توقتاتاتىن بولساق، جۇرەكتىڭ بۇلشىق ەت كلەتكالارى بولىنە باستايدى دەپ ويلايمىز. ەندىگى ماسەلە - وسى مولەكۋلانى تەجەۋ ءادىسىن تابۋ. الداعى 5-10 جىلدا مۇنى تاۋىپ، ادامداردىڭ اتالمىش دەرتىن ەمدەۋگە پايدالانا باستايمىز دەپ ۇمىتتەنەمىز.

www.24.kz