قوستاناي وبلىسىندا كەيكى باتىردىڭ كەسەنەسى بوي كوتەردى

استانا. قازاقپارات - ​  «رۋحاني جاڭعىرۋ» باعدارلاماسى اياسىندا بوي كوتەرگەن كەيكى باتىردىڭ كەسەنەسى -  «قازاقستاننىڭ ساكرالدى گەوگرافياسى» جوباسىنا ۇسىنىلماق. قازىر نىسان سالىنىپ ءبىتتى، ەندى ماڭايىن اباتتاندىرۋ جۇمىستارى ءجۇرىپ جاتىر.

ال باتىردىڭ باس سۇيەگىن جەرلەۋ ءراسىمى قىركۇيەك ايىنا جوسپارلانعان. كەيكى باتىر ەشقانداي ساياساتتىڭ سويىلىن سوققان جوق. ول قازاق دالاسىنا وكتەمدەپ، ات ويناتىپ كەلگەندەردىڭ بارىنە قارسى تۇردى. سول ءۇشىن اقتارمەن ارپالىستى، قىزىلدارمەن قانداستى. كەڭەس زامانىندا باتىردىڭ اتىن ايتۋعا تىيىم سالىندى، ايتسە دە ول حالىق جۇرەگىنەن وشكەن ەمەس. ارقالىق قالاسىنداعى مىنا ءمۇسىن ەلدىڭ مەرگەنگە دەگەن ىقىلاسىنىڭ ايعاعىنداي. حالىقتىڭ ارداقتى باتىرىنا دەگەن قۇرمەتى كەسەنە سالۋ بارىسىندا دا ايقىن بايقالدى.

 قۇرىلىس كەزىندە سەمەنت ەزۋگە جاي سۋ جاراماي، ىركىتتىڭ سارىسۋى قاجەت بولدى. جاقىن ماڭايدا ءسۇت زاۋىتى جوق، كۇنىنە 200 ليتر سارىسۋدى جەرگىلىكتى تۇرعىندار وزدەرى جەتكىزىپ تۇردى. ەلدىڭ كومەگىنىڭ ارقاسىندا كەسەنە ساپالى ءارى جىلدام سالىندى.

اباي مۇقانوۆ، مەردىگەر:

-  بۇگىنگە جۇمىستار جاقسى ءجۇرىپ جاتىر. كەسەنەنى بىتتىك دەۋگە بولادى. بۇگىنگى كۇنى قالعان جۇمىس ماڭايىندا اسفالت توسەپ، توسەمتاس سالۋ، اباتتاندىرۋ قالدى.

 كەسەنەگە ارقالىق- تورعاي تاسجولىنىڭ بويى مەرگەننىڭ اتامەكەنى تاستى اۋىلىنىڭ تۇسى تاڭدالعان. بيىكتىگى 15 مەتر عاجايىپ عيمارات جيىرما شاقىرىمنان «مەن مۇندالايدى». باتىردىڭ تويىنا دايىندىق بارىسىندا، وبلىس بيۋدجەتىنەن 25 ميلليون تەڭگە ءبولىنىپ، امانتوعاي، جالداما اۋىلدارىندا قيراعان ۇيلەردىڭ ورنى تازارتىلدى. تورعايدىڭ جولدارى دا جوندەلۋدە.

 نۇرجان وتەگەنوۆ، امانگەلدى اۋدانىنىڭ اكىمى:

 -  اۋليەكول- جالداما تاس جولىنىڭ 64-شاقىرىمىنا ورتا جوندەۋ جۇرگىزىلىپ جاتىر. وعان وبلىستىق دەڭگەيدەن 1 ميلليارد تەڭگە ءبولىندى. قىركۇيەك ايىنىڭ 10-نا دەيىن ول بىتەدى. ەكىنشى ءبىر ايتا كەتەتىن ءجايت، ارقالىق- تورعاي تاس جولىنىڭ كۇردەلى جوندەۋ جۇمىستارىنىڭ 7,8 شاقىرىمىنا تاعى دا 1 ميلليارد تەڭگە ءبولىندى. تويعا ازىرلىك نەگىزگى رۋحاني- مادەني شارالار وتەتىن ارقالىق قالاسىندا دا قىزۋ ءجۇرىپ جاتىر.

 ەرلان قالماقوۆ، وبلىستىق مادەنيەت باسقارماسىنىڭ باسشىسى:

-  رەسپۋبليكالىق دەڭگەيدەگى عىلىمي- تاجىريبەلىك كونفەرەنسيا، رەسپۋبليكالىق اقىندار ايتىسى، ات جارىسى، قازاق كۇرەسىنەن تۋرنير قاراستىرىلعان. اراعا عاسىرعا جۋىق ۋاقىت سالىپ، بىلتىر ەلگە ورالعان باتىردىڭ باسسۇيەگىن جەرلەۋ ءراسىمى 15- قىركۇيەككە بەلگىلەنىپ وتىر. ال كەيكى كوكەمباي ۇلىنىڭ كەسەنەسى كيەلى ورىندار تىزىمىنە كىرىپ، حالىقتىڭ تاعزىم ەتەر نىسانىنا اينالماق. ايتا كەتۋ كەرەك، عيمارات دەمەۋشىلەردىڭ قاراجاتىنا تۇرعىزىلعان.

 اۆتورلارى: ابىلاي ماۋدانوۆ، ەرمەك مۇحامەدياروۆ