قوياندىداعى ادام سەنگىسىز وقيعا: قاراجاتى جەتپەسە دە، قاجىلىققا باراتىنىن ەستىگەن كەيۋانا ەگىلە جىلادى
بيىلعى جىلى ۆيزا بەرۋدىڭ سوڭعى ساتىندە ادام سەنگىسىز وقيعا بولعان دەپ حابارلايدى NUR. KZ.
«وسىعان دەيىن باس ءمۇفتي تۇرمىسى تومەن وتباسىلاردى ارالادى. سول كەزدە استانا ماڭىنداعى قوياندى اۋىلىندا تۇراتىن جەتىم وتباسىنان شىققان مۇگەدەك انامىزدىڭ ۇيىنە بارعان ەدى. ول كىسى جاعدايىن ايتتى: «ەشقانداي قاراجاتىم جوق، 40 مىڭ تەڭگە زەينەتاقىما پاتەر جالداپ وتىرمىن. مەن قاجىلىققا بارۋدىڭ قارجىسىن ومىرىمدە جيناي المايمىن. اللادان قاسيەتتى جەردى كورسەتۋدى سۇرايمىن» دەگەن بولاتىن.
باس ءمۇفتي دەمەۋشىلەر تابىلسا، قاجىلىققا اپارۋ مۇمكىندىكتەرىن قاراستىراتىنىن ايتىپ كەتكەن. ول كىسى سول ءسوزدى ەستىپ الىسىمەن «حازىرەت سۇلتان» مەشىتى مەن ءدىني باسقارماعا بىرنەشە رەت كەلدى»، - دەيدى ءمادينا مەن مەككە قالاسىنا قازاقستان مۇسىلماندارىن باستاپ كەتكەن قاجىلىق ميسسياسىنىڭ جەتەكشىسى بەيبىت مىرزاگەلديەۆ.
قاريا تىلەگىن ورىنداۋ ءۇشىن ءمۇفتيات ماماندارى ءتۇرلى جولدارىن ىزدەگەن.
«قارجى قاراستىرۋ قيىن بولدى. ول كىسىگە بيىل بارا المايتىنىن ايتتىق. اپامىز ىقىلاس تانىتا بەردى. قاجىلىققا بارۋ كۆوتاسى تاۋسىلدى، تەگىن اپاراتىن ازامات تابىلمادى. ونىڭ ۇستىنە ول كىسى دەنساۋلىعىنا بايلانىستى قاجىلىق امالدارىن جاساي المايدى. قاجىلىققا بارۋعا توسقاۋىل قويىلعان بارلىق نارسەلەر ول كىسىنىڭ بويىندا بولدى. ۆيزا بەرۋدى اياقتاپ جاتقاندا ەرەكشە وقيعا بولدى. سوڭعى كۇنى ءبىر فيرما باسشىسىنىڭ كومەكشىسى شەتەلدىك ازامات بولىپ، وعان ميسسيا قۇجاتى جۇرمەيتىن بولىپ شىقتى. شەتەل ازاماتىنا بولەك قۇجات دايىندالىپ، ونىڭ ورنى بوساپ قالدى»، - دەيدى بەيبىت مىرزاگەلديەۆ.
وسى مۇمكىندىكتى جىبەرمەۋ ءۇشىن ءمۇفتيات ماماندارى بىرنەشە ادامعا وتىنىشپەن شىققان.
«قاجىلىق بولىمىنە «بوساپ قالعان ورىندى الماڭىزدارشى» دەگەن ۇسىنىس ايتتىق. قاجىلىقتى ارمانداپ جۇرگەن ءبىر انامىز بار، ونىڭ ەشقانداي جاعدايى جوق، قاجىلىققا اپارۋ قارجىسى دا ءالى شەشىلگەن جوق، ورىندى الماي كۇتىڭىزدەرشى» دەپ ءوتىنىش بىلدىردىك.
سول كەزدە تۋريستىك فيرمانىڭ باسشىسى حابارلاسىپ، اپانىڭ قاجىلىق ساپارىنا جۇمسالاتىن قارجىنى كوتەرەتىنىن ايتتى. وسىلاي بيىلعى قاجىلاردىڭ ەڭ سوڭعىسى بولىپ سول كىسىنىڭ ۆيزاسى دايىندالدى. ول 65 جاستاعى كەيۋانا. دەنساۋلىعىنان، ءومىردىڭ تاۋقىمەتىن كوپ كورگەندىكتەن ەگدە كورىنەدى.
قاجىلىققا باراتىنىن ەستىگەندە اپامىزدىڭ كوز جاسى كول بولدى. ول كىسى جاساعان دۇعاسىنىڭ ارقاسىندا كەلىپ وتىر. سوندىقتان قاجىلىققا ادامنىڭ قالاۋىمەن ەمەس، اللا قالاعان مۇسىلمانداردىڭ جەتەتىنىن ۇمىتپاۋ كەرەك. اللا وسىلاي دا الىپ كەلەدى»، - دەيدى قاجىلىق ميسسياسىنىڭ جەتەكشىسى بەيبىت مىرزاگەلديەۆ.