قازاقستان پرەزيدەنتى تومەن بايىتىلعان ۋران بانكىن اشادى
بۇل تۋرالى ق ر پارلامەنتى سەناتىنىڭ ءتوراعاسى قاسىم-جومارت توقايەۆ استانادا ءوتىپ جاتقان پاگۋوش عالىمدار قوزعالىسىنىڭ 62-كونفەرەنسياسىندا ءمالىم ەتتى.
ەسكە سالا كەتسەك، 29- تامىزدى ب ۇ ۇ يادرولىق سىناقتارعا قارسى كۇرەس كۇنى دەپ بەلگىلەگەن.
«ءبىز 2005-جىلى سەمەيدە قول قويىلعان ورتالىق ازيادا يادرولىق قارۋدان ازات ايماق قۇرۋ تۋرالى شارتتى ىسكە اسىرۋ باعىتىندا بەلسەندى جۇمىستار جۇرگىزۋدەمىز. قازاقستان اۋماعىندا ماگاتە حالىقارالىق تومەن بايىتىلعان ۋران بانكىنىڭ قۇرىلۋى يادرولىق قارۋدى تاراتپاۋدى نىعايتۋعا قوسقان قوماقتى ۇلەس بولىپ تابىلادى. ونىڭ اشىلۋى 29- تامىز كۇنى مەملەكەت باسشىسىنىڭ قاتىسۋىمەن وتەدى»، - دەدى سەنات سپيكەرى پاگۋوش عالىمدار قوزعالىسى كونفەرەنسياسىنىڭ اشىلۋىندا.
قاسىم-جومارت توقايەۆ قازاقستاننىڭ تاۋەلسىزدىككە قول جەتكىزگەن ساتتەن باستاپ، وزىنە العان حالىقارالىق مىندەتتەمەلەردى مۇلتىكسىز ورىنداپ، يادرولىق قاۋىپسىزدىكتى قامتاماسىز ەتۋ مەن مەن يادرولىق قارۋدى تاراتپاۋ ىسىنە ەلەۋلى ۇلەس قوسىپ كەلە جاتقانىن اتاپ ءوتتى.
سوندىقتان، الەمدىك قاۋىمداستىق قازاقستاندى يادرولىق قارۋعا قارسى قوزعالىستىڭ كوشباسشىسى دەپ تانيدى.
«بارشا ادامزاتتىڭ بەيبىت ءومىر ءسۇرۋى مەن تۇراقتى بولاشاعى ءۇشىن كۇرەس جولىندا قازاقستان رەسپۋبليكاسىنىڭ ىرگەسىن قالاعان پرەزيدەنت نۇرسۇلتان نازاربايەۆ قوسقان ۇلەستىڭ تاريحي ماڭىزى زور. مەملەكەت باسشىسىنىڭ 1991-جىلى سەمەي يادرولىق پوليگونىن جابۋ مەن يادرولىق قارۋدىڭ قۋاتى جاعىنان الەمدەگى ءتورتىنشى ارسەنالىنان باس تارتۋ تۋرالى شەشىمدەرى جاھاندىق قاۋىپسىزدىككە قاراي جاساعان جاۋاپتى قادامنىڭ تەڭدەسسىز ۇلگىسى بولدى»، - دەدى ول.
سونىمەن بىرگە، ق. توقايەۆ قازاقستاننىڭ يادرولىق قارۋدان باس تارتۋ جانە ونى تاراتپاۋ، يادرولىق قاۋىپسىزدىك جونىندەگى بارلىق حالىقارالىق شارتتاردىڭ قاتىسۋشىسى ەكەنىن اتاپ ءوتتى.
«ەلىمىزدىڭ باستاماسىمەن ب ۇ ۇ باس اسسامبلەياسى سەمەي پوليگونى جابىلعان كۇن - 29- تامىزدى حالىقارالىق يادرولىق سىناقتارعا قارسى كۇرەس كۇنى جانە 26- قىركۇيەكتى حالىقارالىق يادرولىق قارۋدى تۇبەگەيلى جويۋ ءۇشىن كۇرەس كۇنى دەپ جاريالادى. قازاقستاننىڭ باستاماسىمەن ب ۇ ۇ باس اسسامبلەياسىنىڭ 2015-جىلى جەلتوقساندا قابىلداعان يادرولىق قارۋدان ازات الەمگە قول جەتكىزۋ جونىندەگى جالپىعا ورتاق دەكلاراتسياسىن قابىلدادى»، - دەپ ەسكە سالدى ق. توقايەۆ.
ەسكە سالا كەتسەك، 25-29- تامىز كۇندەرى قازاقستان استاناسىندا عىلىم مەن جاھاندىق پروبلەمالاردى تالقىلايتىن پاگۋوش عالىمدار قوزعالىسىنىڭ 62-كونفەرەنسياسى وتەدى.
اۆتور: ايجان سەرىكجان قىزى