رەسەيدىڭ ايگىلى ءانشىسى اللا پۋگاچەۆا زەينەتاقىسىنىڭ ازدىعىنا شاعىمداندى
اتاقتى ءانشى ايىنا نەبارى 17 مىڭ رۋبل (شامامەن 95 مىڭ تەڭگە) كولەمىندە زەينەتاقى الادى. پۋگاچەۆانىڭ ك س ر و حالىق ءارتىسى اتاعى مەن چەرنوبىل اپاتىنىڭ زارداپتارىن جويۋشى رەتىندە الاتىن اقىسىن قوسقاننىڭ وزىندە وسىنداي سومما شىعادى ەكەن.
بۇل تۋرالى «دني. رۋ» پورتالى حابارلادى.
پۋگاچەۆا زەينەت دەمالىسىنا شىققان سوڭ، ونىڭ كۇيەۋى ماكسيم گالكين كەڭەس وداعى كەزىندە ءارتىستىڭ پلاستينكالارىنىڭ ميلليونداعان دانامەن شىعارىلعانىن اتاپ ءوتتى.
«ول چەرنوبىلدە ونەر كورسەتتى، ءومىر بويى ەڭبەك ەتتى، ال الىپ وتىرعان زەينەتاقى سومماسى ءتىپتى كۇلكىڭدى كەلتىرەدى»، - دەپ مالىمدەدى ول.
تانىمال ءانشى ەلدى شۋلاتقان كونسەرتتەردىڭ وزىنەن از پايدا تاپقان. ول ليپەتسك فيلارمونياسىنىڭ سوليسى رەتىندە ءار ونەر كورسەتۋىنە 7,5 رۋبلدان الىپ وتىردى. ك س ر و مادەنيەت مينيسترلىگىنىڭ مەملەكەتتىك تاريفتىك كوميسسياسى بەرگەن مالىمەتكە سۇيەنسەك، 1978 -جىلى پۋگاچەۆانىڭ ءبىر رەتتىك كونسەرت بەرۋ قۇنى 16 رۋبل 50 تيىندى قۇراعان. ستەفانوۆيچتىڭ كەزىندە ءانشى 47 رۋبل 50 تيىن الىپ وتىرعان. ونىڭ زەينەتاقىسى دا وسى تابىستارىنا نەگىزدەلىپ ەسەپتەلگەن.
باسىلىمنىڭ حابارلاۋىنشا، ءانشى زەينەتاقى تۋرالى جۋىردا وتكەن نەمەرەسىنىڭ تويىندا ايتىپ شاعىمدانىپتى (تويدىڭ وزىنە 25 ميلليون رۋبل اقشا كەتكەن).
«زەينەتاقىم از، ءبىراق ءالى ءبىر جىلعا دەيىن شىدايمىن»، - دەدى اعىنان جارىلىپ پۋگاچەۆا. ول وسىلايشا نەمەرەسىنە تاعى ءبىر جىل ۋاقىت كومەكتەسە الاتىنىن مەڭزەگەن.
ب ا ق- تىڭ حابارلاۋىنشا، پۋگاچەۆا كوپتەگەن جاندارعا كومەكتەسەدى. ول ارباعا تاڭىلعان جانكۇيەرىنە ۇدايى اقشا اۋدارىپ، ساحنا ارداگەرلەرىنە دە كومەك قولىن سوزادى ەكەن. ماسەلەن، پۋگاچەۆا كوزى ءتىرى كەزىندە تاتيانا سامويلوۆاعا اۆتوكولىك سىيلاپتى.
دەگەنمەن زەينەتاقىسىنىڭ ازدىعىنا قاراماستان، پۋگاچەۆا Forbes نۇسقاسى بويىنشا، رەسەيدەگى ەڭ قالتالى ارتىستەردىڭ قاتارىنا كىرەدى. رەيتينگ بويىنشا، ءارتىستىڭ ءبىر جىلدىق تابىسى ءتورت ميلليون دوللاردى قۇرايدى. پۋگاچەۆانىڭ جالپى بايلىعى 100 ميلليون دوللارعا باعالانىپ وتىر.