يتاليادا تۋريستەر جاعاجايدىڭ قۇمىن تاسىپ اكەتىپ جاتىر

دەمالىس ماۋسىمىنا وراي ارالداعى بيلىك زاڭ قابىلداپ، قۇم، تاس جانە ۇلۋ قابىرشىقتارىن اكەتۋگە تالپىنعان ءتورت قۇقىق بۇزۋشىعا 1000 ەۋرو كولەمىندە ايىپپۇل تولەتتى. جەرگىلىكتى تۇرعىنداردىڭ كوپ جىلعى شاعىمىنان كەيىن كەدەن دە اۋەجايداعى جۇك سالعىشتاردى قاتاڭ باقىلاپ، جارىق تۇسىرە وتىرىپ، باعالى تابيعي كاپيتالداردى ىزدەۋگە كىرىستى.

1994-جىلى بيلىك ساردينيانىڭ سولتۇستىك شىعىسىندا ورنالاسقان ايگىلى قىزعىلت قۇمدى بۋددەلي ارالىنداعى جاعاجايعا كىرۋگە تىيىم سالدى.

2015-جىلدىڭ جازعى ءۇش ايىندا عانا ساردينياداعى تەك ءبىر اۋەجايدىڭ وزىندە كەدەن قىزمەتكەرلەرى بەس توننا جاعاجاي قۇمىن تاركىلەدى، دەپ جازادى جەرگىلىكتى باسىلىمدار.

وسىعان نارازى ارال تۇرعىندارى شەنەۋنىكتەردەن مۇنداي كادەسىي جيناۋدى قىلمىس دەپ تانىپ، شارا قولدانۋىن تالاپ ەتكەن.

جۇرتشىلىقتىڭ ارىز-شاعىمىنان كەيىن زاڭ قابىلدانىپ، بارلىق تۇردەگى - اق، سارى، ۇساق جانە ءىرى كۆارتستى قۇمداردىڭ تاسىمالدانۋىنا 500 دەن 3000 ەۋروعا دەيىن ايىپپۇل تولەۋ جازاسى ەنگىزىلدى.

«ساردينيا ارالدارىندا ايرىقشا ءتۇستى قۇمنىڭ پايدا بولۋىنا ميلليونداعان جىلدار كەتكەن. ال، مۇندا جىل سايىن كەلەتىن ميلليونداعان تۋريستەر تابيعاتتىڭ تاماشا بولشەگىن ءبىر-ءبىر قۇتىدان ەستەلىككە اكەتەتىن بولسا، تۇك قالماۋى مۇمكىن»، دەپ دابىل قاعادى جەرگىلىكتى تابيعات قورعاۋشىلارى.