بيزنەستەگى ايەلدەردىڭ ۇلەسى قانشا

استانا. قازاقپارات - قازاقستان رەسپۋبليكاسىنىڭ مەملەكەتتىك حاتشىسى گۇلشارا ءابدىحالىقوۆا قازاقستاندا جۇرگىزىلىپ جاتقان گەندەرلىك تەڭدىك ساياساتىنىڭ جۇمىسى تۋرالى اڭگىمەلەپ بەردى، دەپ حابارلايدى «قازاقپارات» ح ا ا ءتىلشىسى.

«بۇل ماسەلە ءبىز ءۇشىن وتە ماڭىزدى ءارى ول ءاردايىم كۇن تارتىبىندە. سوڭعى جىلدارى ءبىرقاتار تۇجىرىمدامالىق قۇجاتتار قابىلداندى. ولاردىڭ ىشىندە 2006-2016 -جىلدارعا ارنالعان گەندەرلىك تەڭدىك ستراتەگياسى بار. بۇل ستراتەگيا ءوز جۇمىسىن اياقتاپ، 2030 -جىلعا دەيىنگى جاڭا گەندەرلىك دامۋ تۇجىرىمداماسى قابىلداندى. ە ق ى ۇ- نىڭ قولداۋىمەن ءبىز ەرلەر مەن ايەلدەردىڭ تەڭدىگى، تۇرمىستىق زورلىق- زومبىلىققا قارسى ءىس- قيمىل جونىندە ەكى زاڭ قابىلدادىق. بۇل زاڭدار جۇمىس ىستەپ تۇر. ۋاقىت تالابىنا ساي ولارعا وزگەرىستەر ەنگىزىلەدى»، - دەدى ە ق ى ۇ وكىلدەرىمەن كەزدەسۋى كەزىندە گۇلشارا ءابدىحالىقوۆا.

ونىڭ ايتۋىنشا، بۇگىنگى تاڭدا قازاقستان ەكونوميكاسىنداعى ايەلدەردىڭ ۇلەسى (اسىرەسە شاعىن جانە ورتا بيزنەستە) %50 قۇرايدى. پارلامەنت ماجىلىسىندە بۇل كورسەتكىش %27، ءماسليحاتتاردا %22- تەن %30 كە دەيىن جەتكەن.

«ەلدە ايەلدەر قوعامدىق جانە ساياسي ومىردە، ەكونوميكادا، الەۋمەتتىك سالالاردا جۇمىس ىستەي الاتىنداي جاعداي جاسالعان» - دەدى مەملەكەتتىك حاتشى.