لوگوتيپى لاتىن قارپىنە اۋىستىرىلعان قازاقستان ۇلتتىق ارناسى ەندى كورەرمەنگە نە ۇسىنادى
ەڭ باستى وزگەرىس - سول كۇننەن باستاپ ۇلتتىق ارنانىڭ لوگوتيپى لاتىن تىلىنە اۋىستىرىلىپ، «Qazaqstan» دەپ اتالاتىن بولادى. «قازاقپارات» ح ا ا ءتىلشىسى وقىرمان قاۋىمدى رەسپۋبليكانىڭ بارلىق ايماقتارىنا تاراپ، مەملەكەتتىك ءتىلدىڭ مەرەيىن اسىراتىن ۇلتتىق ارنانىڭ جاڭا ماۋسىمداعى تىنىسىمەن تانىستىرادى.
جاڭا ماۋسىمدا قازاقستان ۇلتتىق ارناسىندا ءتۇرلى باعىتتاعى ونداعان جوبا كورەرمەنگە جول تارتادى. اتاپ ايتساق، «جىبەك جولى جۇلدىزى»، «مەن قازاقپىن» حالىقارالىق مۋزىكالىق مەگاجوبالارى، ۇلتتىق ەسترادانى ناسيحاتتايتىن - «Hit Qazaqstan» مۋزىكالىق ءان-شەرۋى جاڭا ماۋسىمدا ەفيرگە ەنەدى.
وعان قوسا قوعامدىق، ينتەللەكتۋالدىق باعىتتاعى باعدارلامالاردىڭ سانى ارتادى. بۇگىنگى زاماننىڭ سۇرانىسىنا ساي كەلەتىن رەاليتي - شوۋ جانرىنداعى باعدارلامالار كورسەتىلەدى. كاسىپكەرلىكتى ناسيحاتتايتىن - «ۇمىتكەر»، تابيعاتتىڭ تىلسىم كۇشى مەن قۇدىرەتىن كورسەتەتىن - «24 ساعات تابيعات قۇشاعىندا» ەكشن رەاليتي- شوۋى، وتباسىلىق قۇندىلىقتاردى دارىپتەيتىن - «ەنە مەن كەلىن» قاتارلى باعدارلامالار ەل نازارىنا ۇسىنىلماق.
سونىمەن قاتار ەفيردەن ءبىرقاتار دەرەكتى فيلمدەر توپتاماسى كورسەتىلەدى: قازاقستاننىڭ كوپشىلىككە بەيمالىم تاريحى تۋرالى اڭگىمەلەيتىن - «كيەلى قازاقستان»، سونداي ەلىمىزدىڭ ايگىلى ادامدارى جايلى سىر شەرتەتىن «ۇلى دالا ۇلاعاتى». سونىمەن قاتار، رەبرەندينگ اياسىندا بۇرىنعى باعدارلامالاردىڭ فورماتتارى وزگەرەدى.
قازىرگى تاڭدا ەلىمىزدە شەتەلدىك تەلەسەريالداردان گورى وتاندىق ونىمدەرگە قىزىعۋشىلىق ارتىپ وتىر. وسى باعىتتا سوڭعى بەس جىل وتاندىق سەريالداردى ءتۇسىرۋ جۇمىستارى باستالىپ، زور تاجىريبە جيناقتالعان. البەتتە، سەريال ءتۇسىرۋ جۇمىسىندا كوش باستاعان ۇلتتىق ارنانىڭ جاڭا ماۋسىمدا ازىرلەگەن تۋىندىلارى كوپ. «قازاقستان» ۇلتتىق ارناسى وتاندىق تەلەسەريالداردى دامىتۋ ماقساتىندا 2009 -جىلدان وسى ۋاقىتقا دەيىن الۋان تاقىرىپتى قامتيتىن 77 تەلەحيكايا تۇسىرگەن. جاڭا ماۋسىمدا ارنا ءوز كورەرمەندەرىنە «ءومىر داستان» تاريحي دراماسىن، «ىڭكار جۇرەك» تەلەحيكاياسىنىڭ ەكىنشى ماۋسىمىن، «ەكى ءجۇز»، «انا قادىرى»، «تۋعان جەر»، «جاڭا قونىس» حيكاياسىنىڭ ەكىنشى ماۋسىمىن، «قوزى كورپەش - بايان سۇلۋ»، «ساعان سەنەمىن» تۋىندىلارىن ءدۇيىم جۇرتتىڭ نازارىنا ۇسىنادى. بۇل تۋىندىلاردىڭ قاي- قايسىسى دا كورەرمەندەردىڭ سۇرانىسىنا يە. وتكەنگە ءۇڭىلىپ، بۇگىنگى كۇننىڭ بولمىسىنان سىر شەرتەتىن، ەل تاريحى مەن ۇلت مۇددەسى جولىندا زور قىزمەت اتقارىپ، بولاشاققا باعىت بەرەتىن تەلەحيكايالار كوشى ءالى دە جالعاسىن تابا بەرمەك.
ەسكە سالا كەتسەك، 23 -تامىزدا ق ر اقپارات جانە كوممۋنيكاتسيالار ءمينيسترى داۋرەن ابايەۆ پەن «قازاقستان» ر ت ر ك ءتوراعاسى ەرلان قارين تەلەراديوكورپوراتسيانىڭ بارلىق مەديااكتيۆتەرىندە جاڭا ماۋسىمنىڭ تۇساۋكەسەرىن وتكىزگەن بولاتىن. 28 -تامىزدا «قازاقستان» تەلەراديوكورپوراتسياسىنىڭ مەديا- رەسۋرستارىندا جاڭا ماۋسىم باستالادى. وسى تۇرعىدا تەلەراديوكورپوراتسيانىڭ قۇرامىنا ەنەتىن ارنالار مەن راديولاردا اۋقىمدى وزگەرىستەر بولىپ، رەبرەندينگ جۇرگىزىلدى، ستۋديالار جاڭارتىلىپ، جاڭا باعدارلامالار ەفيرگە قوسىلادى.
رەبرەندينگ بارىسىندا - «قازاقستان» كورپوراتسياسىنىڭ مەديااكتيۆتەرىنە ورتاق، تانىمال لوگوتيپ بەكىتىلىپ، رەنەيمينگ، رەديزاين جۇمىستارى جۇرگىزىلگەن. جاڭا لوگوتيپ - كورپوراتسيانىڭ قۇرامىنداعى ارنالار مەن راديوستانتسيالاردىڭ ءبىرتۇتاستىعىن بىلدىرەتىن ارنايى بەلگى رەتىندە - قازاقستان رەسپۋبليكاسىنىڭ مەملەكەتتىك تۋى ىسپەتتى جاسالعان. جالپى جاڭا لوگوتيپ - كورپوراتسيانىڭ تەحنولوگيالىق دامۋعا ۇمتىلىسىن، ۇلكەن مەديا وتباسى رەسۋرستارىنىڭ ساباقتاستىعىن بىلدىرەدى.
28 -تامىزدان باستاپ «قازاقستان» ۇلتتىق ارناسى - «Alma TV» ،«ID TV» سياقتى ەلدەگى ءىرى كابەلدىك وپەراتورلار ارقىلى HD فورماتتا حابار تاراتا باستايدى.
