قىتايلىق ينۆەستورلار اقتوبەدە بىرنەشە جوبانى قولعا الدى

اقتوبە. قازاقپارات - قىتايلىق ينۆەستورلار اقتوبەدەگى بىرنەشە زاۋىتقا قارجى سالماق.

جارىلعىش زاتتار شىعاراتىن زاۋىت پەن تىڭايتقىش شىعاراتىن ءوندىرىس ورنىنىڭ 2020-جىلى ىسكە قوسىلۋى جوسپارلاندى، دەپ حابارلايدى قازاقپارات ءتىلشىسى.

قىتايلىق ينۆەستورلار اقتوبەدەگى بىرنەشە ءوندىرىس ورنىن قولعا الدى. ماسەلەن، شيلىساي كەن ورنىنداعى تىڭايتقىش شىعاراتىن زاۋىت كەڭەيتىلمەك. اۋىل شارۋاشىلىعىنا قاجەتتى تىڭايتقىش وندىرەتىن زاۋىتتا ەندى ديامموني فوسفات جانە مونوامموني فوسفات شىعارىلادى.

مۇعالجار اۋدانىندا ورنالاسقان بۇل زاۋىتقا ينۆەستورلار 1,4 ميلليارد دوللار قارجى سالماق. قىتايلىق «Wengfu Group Co Ltd» كومپانياسى نەگىزگى ينۆەستور جانە جوبالاۋشى.

بولجام بويىنشا كەن ورنىنىڭ شيكىزاتى 50 جىلعا جەتۋى ءتيىس. تىڭايتقىش قىتاي، ورتالىق، شىعىس ەۋروپا مەن قارا، بالتىق تەڭىزدەرى اۋماعىنا شىعارىلادى.

العاشقىدا جىلىنا 860 مىڭ توننا، كەيىن 1,6 ميلليون توننا تىڭايتقىش وندىرىلمەك.

«وندىرىسكە قاجەتتى جارىلعىش زاتتار شىعاراتىن «نيتروحيم گرۋپپ» كومپانياسىنا قىتايلىق ينۆەستورلار قارجى سالادى. ءوندىرىس اۋقىمىن كەڭەيتۋگە ارنالعان جوبانى «Norinco International»  كومپانياسى قولعا الدى.

قۋاتتىلىعى جىلىنا 450 مىڭ توننا. مۇندا 1 مىڭ ادام جۇمىس ىستەيدى. جوبا 2020-جىلى ىسكە اسىرىلادى دەپ جوسپارلانعان.

قىتايلىق كومپانيا جوبالاۋ، قۇرىلىس، مونتاجداۋ، زاۋىتتى ىسكە قوسۋ، مامانداردى وقىتۋ جۇمىستارىن تولىق ءوز مىندەتىنە الىپ وتىر. قازىرگى كەزدە تەحنيكالىق-ەكونوميكالىق نەگىزدەمە، بيزنەس جوسپار دايىندالۋدا»، - دەدى اقتوبە وبلىستىق يندۋستريالىق- يننوۆاتسيالىق دامۋ باسقارماسى باسشىسىنىڭ ورىنباسارى دارحان ەرماعانبەتوۆ.

ايتا كەتەيىك، الداعى ۋاقىتتا قىتايلىق ينۆەستورلار كاليي تۇزى زاۋىتىن سالۋى مۇمكىن. قازىر تۇزدىڭ قورى انىقتالىپ جاتىر. سونىمەن قاتار، سەمەنت زاۋىتىنا دا قىتايلىق ينۆەستورلار قىزىعۋشىلىق تانىتتى. ال بيىل قازاقستان مۇناي جابدىقتارى زاۋىتى ىسكە قوسىلدى. بۇل قىتايلىق كومپانيادا 80 ادام جۇمىس ىستەيدى. مۇناي-گاز جابدىقتارى مەن قۇبىرلار شىعاراتىن زاۋىتقا 5 ميلليارد تەڭگە ينۆەستيتسيا سالىندى.

اۆتور: التىناي ساعىندىقوۆا