اعىلشىن تىلىندە ءبىلىم بەرۋ كەزەڭ-كەزەڭىمەن جۇزەگە اسادى - ارىن ورساريەۆ

استانا. قازاقپارات - ق ر ءبىلىم جانە عىلىم مينيسترلىگىنىڭ جاۋاپتى حاتشىسى ارىن ورساريەۆ قازاقستان مەكتەپتەرىندەگى كەي پاندەردى اعىلشىن تىلىندە وقىتۋ مۇمكىندىگى تۋرالى ايتىپ بەردى، دەپ حابارلايدى قازاقپارات.

«ءبىز وقىتۋشىلىق قىزمەتىندە اعىلشىن ءتىلىن قولدانا الاتىن 1500 مۇعالىمدى دايىندادىق. بۇل %100 اعىلشىن تىلىندە وقىتىلادى دەگەن ءسوز ەمەس. قازاقستانداعى تاجىريبەگە سايكەس، الدىمەن اقپاراتتىڭ كىشىگىرىم بولىگى اعىلشىن تىلىندە تۇسىندىرىلەدى. ودان كەيىن جارتى جىل ىشىندە بۇل كورسەتكىش %10-20 كە دەيىن جەتەدى جانە ءبىرشاما ۋاقىت وتكەن سوڭ، ءپان تولىعىمەن اعىلشىن تىلىندە وقىتىلادى. قازىر دە ەكى تىلدە ساباق بەرەتىن مەكتەپتەر بار. بۇل پروتسەستى كەزەڭ-كەزەڭىمەن جانە وتە مۇقيات ىسكە اسىرۋدى جوسپارلاپ وتىرمىز. جەكەلەگەن پاندەردى اعىلشىن تىلىندە وقىتۋعا كەزەڭمەن كوشۋدىڭ جول كارتاسى بار»، - دەدى ارىن ورساريەۆ استانادا وتكەن پەداگوگتاردىڭ تامىز كەڭەسىندە.

ق ر ب ع م جاۋاپتى حاتشىسى قازاقستاندا اعىلشىن ءتىلدى پەداگوگتاردى دايىندايتىن مامانداردىڭ بار ەكەنىن ەسكە سالدى.

«بۇل سۇراق ءجيى قويىلادى. ەگەر ادام اعىلشىن تىلىندە ساباق بەرگىسى كەلسە، ارينە، ونىڭ دەڭگەيىن بارىنشا كوتەرۋگە تىرىسامىز. بارلىق مۇعالىمدەردىڭ اعىلشىن ءتىلىن ءبىلۋ دەڭگەيىن %100 قامتاماسىز ەتە المايمىز. ءبىراق، قازىرگى دەڭگەيلەرىن كوتەرۋگە مىندەتتىمىز»، - دەپ اتاپ ءوتتى ول.

سونىمەن بىرگە، جاۋاپتى حاتشى وقىتۋشىلاردى شەتەلدە وقىتۋ ماسەلەسى جونىندە دە پىكىر ءبىلدىردى. «بىزدە «بولاشاق» باعدارلاماسى بار. ەكونوميكالىق تۇرعىدان قاراعاندا بارلىعىن ءجونسىز شەتەلگە ءبىلىم الۋعا جىبەرەدى. ءتىلدى قازاقستاندا دا ۇيرەتۋگە بولادى. بريتاندىق كونسۋلدىڭ قولداۋىمەن اعىلشىن تىلىندە سويلەيتىن ادامداردى قازاقستانعا شاقىرا الامىز. بۇل ءۇشىن  ۇلى بريتانياعا نەمەسە ا ق ش- قا بارۋدىڭ قاجەتى جوق. قازىرگى ۋاقىتتا ءتىل لاگەرى فورماتى بويىنشا وقىتۋ ءجۇرىپ جاتىر. ءبىز پەداگوگتاردى جۇمىسىنان الىپ كەتىپ، تىكەلەي ءتىل ۇيرەتۋ بويىنشا جۇمىس ىستەيمىز. جۇمىسىنان الىستاتپاي دا وقىتۋعا بولادى»، - دەپ تۇيىندەدى ارىن ورساريەۆ.

اۆتور: ايجان سەرىكجان قىزى