التىن قۇيمالاردىڭ ساۋداسى قالاي ءجۇرىپ جاتىر

الماتى. قازاقپارات - قازاقستاندا التىن قۇيمالاردىڭ ساۋداسى بىرتىندەپ قارقىن الىپ كەلەدى.

بۇل تۋرالى بۇگىن ق ر ۇلتتىق بانك باسشىسى دانيار اقىشەۆ ايتتى.

تازارتىلعان التىن قۇيمالاردى ساتىلىمعا شىعارۋ تۋرالى باعدارلاما شىققالى بەرى 3 اي ءوتتى. وسى ۋاقىت ارالىعىندا 620 التىن قۇيما، ياعني 24 كەلى التىن ساتىلعان. كوبىنەسە حالىق اراسىندا 5-10 گرامدىق قۇيمالارعا سۇرانىس وتە جوعارى.

«ايماقتار بويىنشا ستاتيستيكا بار. الماتى مەن استانادان گورى ايماقتاردا التىن قۇيمالاردى ساتىپ الۋشىلار كوبىرەك. ءونىم قىمبات بولسا دا، 100 گرامدىق قۇيمالار دا ساتىلىپ جاتىر. قىمباتتىعىنا قاراماستان، ادامدار ونى ينۆەستيتسيا رەتىندە ساتىپ الىپ جاتىر. بۇل وتە ىڭعايلى اقشا ساقتاۋ قۇرالى. ونى كەز كەلگەن ۋاقىتتا كەز كەلگەن بانككە ساتىپ جىبەرە الاسىز»، - دەدى ول.

ازىرگە، التىن قۇيمالاردىڭ ساۋداسىن «حالىق» جانە «ەۋرازيا بانكى» جۇرگىزىپ جاتىر. حالىق بانكىندە 512 قۇيما ساتىلعان. ولاردىڭ جالپى سالماعى 20 كەلىدەن اسادى. «كوبىنەسە 10 گرامدىق قۇيمالار ساتىلىپ جاتىر. 210 قۇيما وسى ۋاقىت ارالىعىندا ساتىلدى»، - دەدى حالىق بانكىنىڭ باسپا ءسوز قىزمەتىندە.

«ەۋرازيا بانكى» شامامەن 100 قۇيما ساتقان. «التىن قۇيما نارىعىن ودان ءارى دامىتۋ ءبىزدىڭ ماقساتىمىز. ۆاليۋتا ايىرباستاۋ پۋنكتتەرىندە دە التىن قۇيمالار ساۋداسىن ەنگىزۋ ويدا بار. وعان ىڭعايلى قاپتاما جاسالدى. ەندى ونى قاپتاماسىن اشپاي-اق، ەكسپەرتيزا جاساۋعا بولادى. ايىرباستاۋ پۋنكتتەرىنىڭ تەحنيكالىق جابدىقتالۋى وعان تولىق مۇمكىندىك بەرەدى. بۇل ماسەلە دوللارسىزداندىرۋ ۇدەرىسىمەن تىكەلەي بايلانىستى. ويتكەنى، حالىقتىڭ ينۆەستيتسيالىق قۇرالدارى كوپ ەمەس. كوبىنە ادامدار دەپوزيتتە ساقتايدى. ويتكەنى، بۇل نارىق ادامدارعا تانىس. ءبىز التىن قۇيمالار نارىعىن دا تانىمال ەتۋگە بارىنشا جۇمىس جاسايتىن بولامىز»، - دەدى باس بانكير.

ايتا كەتۋ كەرەك، 31- مامىردا ق ر ۇلتتىق بانكى التىن قۇيمالاردى ساتۋ تۋرالى باعدارلامانى ىسكە قوسقان بولاتىن. حالىق ەكىنشى دەڭگەيلى بانكتەر ارقىلى سالماعى 10,20,50, 100 گرام بولاتىن التىن قۇيمالاردى ساتىپ الۋعا بولادى. پروباسى 999,9 قۇيمالار قازاقستاندا شىعارىلعان.

اۆتور: گۇلميرا عوسمانالي