برازيليادا ەسىرتكىمەن ۇستالعان قازاقستاندىق اقتالىپ شىقتى
«2017 -جىلدىڭ 6 -اقپانىندا سان- پاۋلۋ قالاسىنىڭ پوليتسيا قىزمەتكەرلەرى قازاقستان ەلشىلىگىنە 21 جاستاعى قازاقستاندىق بويجەتكەننىڭ ۇستالعانى تۋرالى حابار بەرگەن. سلاۆيانا مينەۆسكايا قالانىڭ اۋەجايىندا ارمەنياعا ۇشىپ بارا جاتقان جەرىنەن ۇستالعان. قاراعاندى قالاسىنىڭ تۇرعىنى سلاۆيانا مينەۆسكايانى برازيليالىق ءتارتىپ ساقشىلارى ءتىنتىپ، چەمودانىنان 2 كەلى كوكاين تاۋىپ العان. 8 -اقپاندا قازاقستان ەلشىلىگى كونسۋل مەن ۇستالعان بويجەتكەننىڭ كەزدەسۋ مۇمكىندىگىنە قول جەتكىزدى. جۇزدەسۋدە بويجەتكەن تۋعان- تۋىستارىنىڭ تەلەفون ءنومىرىن بەرىپ، قالايشا وسى جاعدايعا تاپ بولىپ قالعانىن ءتۇسىندىرىپ بەرگەن»، - دەدى ءانۋار جايناقوۆ.
ەڭ ءبىرىنشى كەزەكتە قازاقستاندىق ديپلوماتتار سلاۆيانانىڭ تۋعاندارىنا بولعان وقيعانى بايان ەتىپ، وتانداسىمىزعا قۇقىقتىق كومەك كورسەتۋ جولدارىن قاراستىرعان. قالالىق سوت قازاقستاندىقتى سوت باستالعانعا دەيىن سان-پاۋلۋداعى تۇزەتۋ مەكەمەسىندە ۇستاۋ تۋرالى شەشىم شىعارعان.
«ديپلوماتتار انىقتاعانداي، قاراعاندى قالاسىنىڭ تۇرعىنى سلاۆيانانىڭ سەنىمىنە كىرىپ، 4 مىڭ ا ق ش دوللارعا برازيلياعا گاۋھار بۇيىمداردى جەتكىزىپ بەرۋدى سۇراعان. بۇعان كەلىسكەن بويجەتكەن سان-پاۋلۋعا ۇشىپ كەلەدى. بويجەتكەندى بەلگىسىز ۇيگە قاماپ ۇستاپ، ەركىن ءجۇرىپ-تۇرۋىن شەكتەگەن. ارادا ەكى اپتا وتكەننەن كەيىن ءبىر ساعات بۇرىن عانا وعان چەمودان ۇستاتىپ، ەرەۆانعا ۇشۋ كەرەكتىگىن بۇيىرعان. اۋەجايعا كىرە بەرىستە ونى پوليتسيا قىزمەتكەرلەرى ۇستاپ، چەموداننىڭ ىشىندەگى جاسىرىلعان ەسىرتكى زاتىن انىقتادى»، - دەپ جازادى ءانۋار جايناقوۆ.
جاس بويجەتكەن قىلمىستىق جوسپاردىڭ قۇربانى بولعانىن بولجاعان ق ر س ءى م قازاقستانعا سۇراۋ جولداپ، «تاپسىرىس بەرۋشىنى» تەكسەرۋدى وتىنگەن. قۇقىق قورعاۋشىلار جەدەل ارەكەت جاساپ، قاراعاندىلىقتىڭ ىزىنە تۇسكەن. سويتسە، بىرنەشە كۇن بۇرىن عانا تاپسىرىس بەرگەن 25 جاستاعى بويجەتكەن وسى قىلمىسقا ۇقساس باپپەن 6 جىل 8 ايعا سوتتالىپ كەتىپتى.
قازاقستاندىق ديپلوماتتار قىلمىستىق ءىستىڭ ماتەريالدارىن پورتۋگال تىلىنە اۋدارىپ، برازيلياداعى تەرگەۋ ورگاندارىنا تاپسىرعان. 7 -تامىزدا سلاۆيانانىڭ سوتى بولىپ، ونىڭ 15 جىلعا دەيىن سوتتالىپ كەتۋ قاۋىپ تۋىنداعان ەدى.
قازاقستاندىق تاراپتان كەلگەن قىلمىستىق ءىس ماتەريالدارىن زەرتتەي كەلە، برازيليالىق سوت قازاقستاندىق بويجەتكەندى بوساتۋ تۋرالى شەشىم شىعاردى.
«ۇستالعان كەزىنەن باستاپ قازاقستاندىق كونسۋل سلاۆياناعا بىرنەشە رەت بارىپ، جالپى جاعدايىن باقىلاۋدا ۇستادى. قازىر ول سان-پاۋلۋدا. جۋىق ارادا قازاقستانعا قايتىپ كەلەدى»، - دەيدى ەلشىلىكتەن.
وكىنىشكە وراي، سلاۆيانا برازيليادا ۇستالعان جالعىز قازاقستاندىق ەمەس. بۇعان دەيىن ءدال وسىعان ۇقساس قىلمىسپەن سان-پاۋلۋ اۋەجايىندا 20 جاستاعى قاراعاندى قالاسىنىڭ تۇرعىنى ۇستالىپ، 30 -مامىرداعى برازيليا سوتىنىڭ ۇكىمىمەن 7 جىلعا سوتتالىپ كەتكەن. قازىرگى تاڭدا ق ر س ءى م بۇل ءىستى قايتا قاراتۋعا كۇش سالىپ جاتىر.
