جارىستا جاتتىقتىرۋشىسىن جەر قىلعان تەننيسشى كەشىرىم سۇرادى

استانا. قازاقپارات - عالامتوردا جاتتىقتىرۋشىسىن جەردەن الىپ جەرگە سالىپ جاتقان قازاقستاندىق تەننيسشى قىزدىڭ ۆيدەوسى پايدا بولدى.

يۋليا پۋتينسيەۆا مەن ونىڭ باپكەرى رومان كيسليانسكي ا ق ش- تا ءوتىپ جاتقان جارىس كەزىندە ۇرسىسىپ قالعان. فرانتسيالىق سپورتشى اليزە كورنەدەن جەڭىلگەن پۋتينسيەۆا بار ءوشىن جاتتىقتىرۋشىسىنان الدى، دەپ حابارلايدى كتك.

ماعان قولداۋ بىلدىرمەي، ۆيدەو قاراپ وتىردىڭ دەپ باپكەرىنە رەنجىگەن يۋليا ءبىرىنشى سەتتىڭ ورتاسىندا راكەتكاسىن سىندىرىپ، اشۋعا بوي الدىردى. ءتىپتى كيسليانسكيگە «ناقۇرىسسىڭ با؟» دەپ سالدى. بۇل كيكىلجىڭ ويىنعا كەرى اسەرىن تيگىزبەي قويمادى. الەمدىك رەيتىنگىدە 50- ورىندا تۇرعان پۋتينسيەۆا ءبىر دە ءبىر گەيم الماستان ەكى سەتتە دە ءنول ەسەبىمەن ۇتىلدى. كەيىن سپورتشى ءوزىنىڭ ەرسى قىلىعى ءۇشىن ۇيالسا كەرەك، الەۋمەتتىك پاراقشاسىندا باپكەرىنەن كەشىرىم سۇرادى.

ايتا كەتەيىك، 22 جاستاعى يۋليا پۋتينسەۆا 2012 -جىلدان بەرى قازاقستاننىڭ اتىنان ونەر كورسەتەدى. وتكەن جىلى ول روللون گورروستىڭ جارتىلاي فينالىنا دەيىن جەتتى. مۇنداي كورسەتكىشتى بۇعان دەيىن ەشبىر قازاقستاندىق تەننيسشى جاساماعان ەدى. ال رومان كيسليانسي مەن يۋليا ۇلكەن سپورتقا قادام باسقالى بەرى بىرگە جۇمىس ىستەپ كەلەدى. شاكىرتىنەن ەلدىڭ الدىندا اۋىر ءسوز ەستىگەن باپكەر ەندى ونىمەن ارى جۇمىس ىستەي مە، جوق پا، ازىرگە بەلگىسىز.