قاراعاندىدا كەلتەحات ارقىلى ءتىل تيگىزگەن ايەل كوشە جيناۋعا جازالاندى
ءوز اتىنا جىبەرىلگەن بالاعات سوزدەردى وقىعان وساكاروۆ اۋدانىنىڭ تۇرعىنى جەكە ايىپتاۋ تۇرىندە سوتقا ارىزداندى. جالا جابۋ، ءتىل تيگىزۋ سىندى ىستەر بويىنشا تۇسكەن جەكە ادامنىڭ ايىپتاۋى پوليتسيادا تىركەلمەستەن اۆتوماتتى تۇردە قىلمىستىق ءىس بولىپ سانالاتىنى بەلگىلى.
زارداپ شەككەن ايەل ءوزىن كەمسىتكەن ەكىنشى ايەلدى ق ر ق ك- نىڭ 131-بابى 1-بولىگى بويىنشا («ءتىل تيگىزۋ») قىلمىستىق جاۋاپكەرشىلىككە تارتۋدى سۇرادى. ونىمەن قوسا، ول ايىپتالۋشىدان مورالدىق شىعىن رەتىندە 100 مىڭ تەڭگە كولەمىندە وتەماقى ءوندىرىپ الۋ تۋرالى ازاماتتىق تالاپ-ارىز ءتۇسىردى.
«سوت بارىسىندا ايىپتالۋشى ايەل تەلەفونمەن س م س- حات الماسۋ بارىسىندا ادەپسىز تۇردەگى سوزدەرمەن وزگە تۇلعانىڭ ار-نامىسىن قورلاۋ پيعىلىمەن زارداپ شەگۋشى ايەلگە ءتىل تيگىزگەنى انىقتالدى»، - دەپ اتاپ ءوتتى قاراعاندى وبلىسى وساكاروۆكا اۋداندىق سوتىنىڭ باسپا ءسوز قىزمەتىنەن.
سۋديا ايىپتالۋشىنى كىنالى دەپ تاۋىپ، وعان 60 ساعاتقا قوعامدىق جۇمىستارعا تارتۋ تۇرىندەگى جازانى تاعايىندادى. ايەلدىڭ ناقتى قانداي جانە قاي جەردەگى جۇمىستاردى ورىندايتىنىن اۋدان اكىمدىگى شەشەتىن بولادى.
ازاماتتىق تالاپ-ارىز ءىشىنارا قاناعاتتاندىرىلدى. سوتتالعان اۋىل تۇرعىنى 15 مىڭ تەڭگە وتەماقى تولەيتىن بولادى.
