كۇننەن قۋات الاتىن ۇشاقتىڭ اۆتورى استاناعا كەلدى
استانالىق تىلشىلەرگە بەرگەن سۇحباتىندا تانىمال ۇشقىش Solar Impulse 2 ۇشاعىمەن جاساعان ساياحاتىنىڭ باستى ماقساتى - ەكولوگيالىق تازا تەحنولوگيالار مەن بالامالى ەنەرگيا كوزدەرىمەن مۇمكىن ەمەس دەپ ساناعان جەتىستىكتەرگە قول جەتكىزۋگە بولاتىنىن كورسەتۋ ەكەنىن ەسكە سالدى.
قازىر ۇشاق شۆەيتساريادا تۇر جانە ونى تەلەكوممۋنيكاتسيا سالاسىندا قولدانۋعا جارامدى. ماسەلەن، ءوزىن- ءوزى باسقاراتىن رەجيمگە قويىپ، wi-fi تاراتۋشى رەتىندە پايدالانۋعا بولادى.
«ۇشاقتى كوككە ۇشىرۋ ءۇشىن 40 ادام قاجەت ەدى. جەر شارىن اينالىپ شىعۋ ءۇشىن ءبىزدى سەرىكتەستەر قارجىلاندىردى جانە وكىنىشكە وراي ونىمەن ەرمەك ءۇشىن ۇشا المايمىن. ەگەر ۇشاق قۇراستىراتىن سەرىكتەستەر تاپسام جانە بىرگە ۇشاتىن 2-3 ۇشقىش تاپسام جانە بۇرىنعىدان جىلدامىراق ۇشسا، تاعى دا ۇشۋىم مۇمكىن. بالكىم، بۇل سەرىكتەستەر قازاقستاننان تابىلىپ، بىرگە ۇشىپ قالارمىز»، - دەدى ول قازاقپارات ءتىلشىسىنىڭ سۇراعىنا جاۋاپ بەرە وتىرىپ.
سونىمەن بىرگە، ب. پيككار كۇن ساۋلەسىنەن قۋات الاتىن ۇشاقتاردىڭ قاشان جولاۋشى تاسىمالدايتىنى تۋرالى ءوز پىكىرىن ءبىلدىردى.
«العاشقى كومپيۋتەرلەردىڭ كولەمى تۇتاس ۇيمەن بىردەي بولدى. ولاردى پايدالانۋ قيىن ءارى قۇنى دا اسا قىمبات ەدى. ءبىراق، سول كومپيۋتەرلەر عالىمدار مەن ونەرتاپقىشتاردى العا جەتەلەدى، ولار تەحنيكانى كىشىرەيتۋدىڭ، ارزانداتۋدىڭ جانە جىلدام جۇمىس ىستەۋىنىڭ جولدارىن ويلاپ تاپتى. قازىر ءارقايسىمىزدىڭ تەلەفونىمىزدا ءبىر-ءبىر كومپيۋتەردەن بار. جانارمايسىز ۇشاتىن ۇشاقتاردى دا وسىنداي جول كۇتىپ تۇر. ءبىز ۇشاقتى قۇراستىرىپ، جۇمىس ىستەي الاتىنىن كورسەتتىك. ەندى ون جىلدان كەيىن (كۇن باتارەيالارىنداعى ۇشاقتار عانا ەمەس) ەلەكترمەن قوزعالاتىن ۇشاقتار جولاۋشى تاسىمالداۋى مۇمكىن، مەن وعان سەنىمدىمىن»، - دەدى بەرتران پيكار.
