تاجىكستان مەن قىرعىزستان كوكپاردان الەم چەمپيوناتىندا قارسىلاس شاق كەلتىرەر ەمەس

استانا. قازاقپارات - استانادا كوكپاردان تۇڭعىش الەم چەمپيوناتىنىڭ ءۇشىنشى كۇنى بولىپ ءوتتى، دەپ حابارلايدى «قازاقپارات» ح ا ا ءتىلشىسى.

سالىم سالۋدىڭ ساقالارى اتانعان قىرعىزستان مەن تاجىكستاننىڭ كوكپارشىلارى ازىرگە بەت قاراتاتىن ەمەس.

ەكى قۇراما دا جارىستىڭ ءۇشىنشى كۇنىندە قارسىلاستارىن ءىرى ەسەپپەن جەڭدى.

اتاپ ايتقاندا، تاجىكتەر تۇركيا قۇراماسىن 12:2 ەسەبىمەن تىزە بۇكتىرسە، قىرعىزدار كورشىلەس وزبەكستان قۇراماسىنان 11:2 ەسەبىمەن باسىم ءتۇستى. قارقىندارىنا قاراعاندا اتى اتالعان ءدال وسى ەكى كوماندا قازاقستان كوكپارشىلارىنىڭ باستى قارسىلاسى بولاتىن سەكىلدى.

ال تۋرنير باستالعالى ەكى مارتە جەڭىلىسكە ۇشىراعان وزبەكستان الدىڭعى ورىنداردان ۇمىتتەنە الماسى انىق.

كۇنى كەشە قىرعىزداردان جەڭىلگەن موڭعوليا قۇراماسى بۇگىن 10:4 ەسەبىمەن ا ق ش كوكپارشىلارىنان ەسەسىن الدى. رەسەي بولسا قىتايدان 0:5 ەسەبىمەن سۇرىنسە، اۋعانستان ۆەنگريا قۇراماسىن 12:2 ەسەبىمەن ارتتا قالدىردى.

بۇگىنگى كۇننىڭ قورىتىندى ويىنىن قازاقستان - ازەربايجان قۇرامالارى اياقتاۋى كەرەك بولاتىن. الايدا ءازىربايجاندىق كوكپارشىلاردىڭ كەلمەي قالۋى سەبەپتى جەڭىس 3:0 ەسەبىمەن اۆتوماتتى تۇردە قازاقستان قۇراماسىنا بەرىلدى.

اۆتور: ايان بەكەن ۇلى