رۋسلان جانپەيىسوۆكە قىلمىستىق كودەكستىڭ ءۇش بابى بويىنشا ايىپ تاعىلدى
كولىك جۇرگىزۋشىلەرىنىڭ قۇقىعىن قورعايتىن ۇيىمنىڭ مۇشەسىنە قىلمىستىق كودەكستىڭ ءۇش بىردەي بابىمەن ايىپ تاعىلدى، دەپ حابارلايدى قازاقپارات ح ا ا ءتىلشىسى.
پوليتسەيلەردىڭ ءتارتىپ بۇزعان ساتتەرىن ۆيدەوعا ءتۇسىرىپ، ونى جاريالاپ كەلگەن 36 جاستاعى ازامات باستاپقىدا اقشا بوپسالادى دەگەن ايپپەن ۇستالعان بولاتىن. ول اۋەلدە تەك وڭتۇستىكتىڭ ساقشىلارىن ءتۇسىرىپ جۇرسە، كەيىننەن بۇكىل قازاقستان بويىنشا پوليتسەيلەردىڭ زاڭسىز ارەكەتتەرىن جاريالاپ جۇرگەن. الايدا ارتىنشا وعان ءتارتىپ ساقشىلارىن بوپسالايدى دەگەن ايىپ تاعىلدى. ياعني، رۋسلان جانپەيىسوۆ كەزەكتى رەت تۇسىرگەن ۆيدەوسىن جاريالاماۋ ءۇشىن 50 مىڭ تەڭگە بوپسالاعان دەپ ايىپتالعان-دى. ونى وسى ارەكەتى ءۇشىن قاماۋعا العان وڭتۇستىك پوليتسەيلەرى ەندى وعان قىلمىستىق كودەكستىڭ ءۇش بابىمەن ايىپ تاققان. بۇل تۋرالى سوت وتىرىسىندا پروكۋرور مالىمدەدى.
«رۋسلان جانپەيىسوۆ ك دەگەن پوليتسيا قىزمەتكەرىن كولىكتى توقتاتقان كەزىندە ۇيالى تەلەفونىنا ءتۇسىرىپ الادى. ارتىنشا بەينەجازبانى ينتەرنەتكە سالامىن دەپ 5 مىڭ تەڭگە بوپسالاعان. كەيىننەن ءتارتىپ ساقشىسى ول اقشانى تەرمينال ارقىلى ۇيالى تەلەفونىنا سالعان. مۇنداي جاعداي ءبىر ەمەس، بىرنەشە رەت قايتالانعان. وسى جىلدىڭ ناۋرىز ايىندا جانپەيىسوۆ جول پاترۋلدىك پوليتسيا قىزمەتكەرىن بوپسالاپ، 50 مىڭ تەڭگە الىپ جاتقان جەرىندە ۇستالدى. ءۇيىن ءتىنتۋ كەزىندە كوپشىلىك ءۇشىن رۇقسات ەتىلمەيتىن دىبىس جازۋ قۇرىلعىلارى تابىلعان. ول وسى ارقىلى مەملەكەتتىك ورگانداردىڭ قىزمەتىنە ارالاسقانى دالەلدەندى»، - دەدى ايىپتاۋ قورتىندىسىمەن تانىستىرعان اباي اۋداندىق پروكۋراتۋراسىنىڭ پروكۋرورى سىرىم جاقسىلىقوۆ.
وسى ايىپتاۋلار بويىنشا رۋسلان جانپەيىسوۆكە قىلمىستىق كودەكستىڭ ءۇش بابى: «اسا ىرى مولشەردە قارجىنى قورقىتىپ الۋ»، «اقپاراتتى جاسىرىن الۋدىڭ ارنايى تەحنيكالىق قۇرالدارىن زاڭسىز دايىنداۋ، جاساۋ، يەمدەنۋ، وتكىزۋ نەمەسە پايدالانۋ» جانە «قوعامدىق بىرلەستىكتەر مۇشەلەرىنىڭ مەملەكەتتىك ورگانداردىڭ قىزمەتىنە زاڭسىز ارالاسۋى» بويىنشا ايىپ تاعىلىپ وتىر. الايدا قوعام بەلسەندىسى مۇنداي ايىپتاۋلارمەن كەلىسپەيتىنىن ايتىپ وتىر.
