پسيحولوگ قازاقستاندا نەلىكتەن اجىراسۋ تىم كوپ بولىپ جاتقانىن ءتۇسىندىردى

استانا. قازاقپارات - قازاقستان پسيحولوگتارى قاۋىمداستىعىنىڭ پرەزيدەنتى ۆلاديمير ستەبليانكو ەلىمىزدە اجىراسۋ سانى نەلىكتەن كوپ بولاتىنىن ءتۇسىندىردى.

ۆلاديمير ستەبليانكونىڭ سوزىنشە، اجىراسۋعا نەگىزگى سەبەپ - وتباسى بەدەلىنىڭ جانە قۇرىلىم رەتىندە وتباسى قۇندىلىعىنىڭ قۇلدىراۋى.

«سوت زالىندا ءجيى بولامىن. ساراپشى پسيحولوگ رەتىندە اجىراسۋ پروتسەستەرىنە قاتىسامىن. وتباسى قوعامنىڭ باستاپقى قۇرىلىمى ەدى، وزگەنىڭ بارلىعى وسىدان ءوربيدى، وسىدان قالىپتاسادى. ال قازىر وتباسى ەكىنشى ورىنعا ءتۇسىپ قالدى. باستى سەبەپ وسى جانە بۇل ۇلكەن دەرت»، - دەيدى ول.

سونىمەن قاتار، ول قازىرگى كەزدە اجىراسۋ سانى كۇن وتكەن سايىن ارتىپ، كوپشىلىك قىزمەتتىك مانساپ پەن ماتەريالدىق جەتىستىكتى ويلايتىنىن اتاپ ءوتتى. «بىزدە ەر جەتكەن ادامداردىڭ ءبارى بيزنەستى عانا ويلايدى. بىزگە اقشا كوپ كەلە باستادى. قازاقستاندا قازىر باستى قۇندىلىق ماتەريالدىق جەتىستىكتەر، قىزمەتتىك مانساپ پەن بيلىك بولىپ وتىر. ال بۇرىن ماحاببات ەدى، ول كەيىن وتباسىنا ۇلاساتىن»، - دەيدى ستەبليانكو.

ساراپشىنىڭ سوزىنشە، مۇنىمەن وتباسى قۇندىلىعىن مەملەكەتتىك دەڭگەيدە ارتتىرۋ ارقىلى كۇرەسۋ قاجەت. «جان-جاققا كوز سالايىق، بىزدە وتباسى قۇندىلىقتارىن ناسيحاتتايتىن باعدارلامالار بار ما؟ جوق. بۇگىندە مەملەكەت بۇعان نازار سالىپ وتىرعان جوق. وكىنىشتى، ارينە»، - دەيدى پسيحولوگ.

اجىراسۋعا سۋبەكتيۆ سەبەپتەردىڭ ءبىرى رەتىندە ساراپشى اكە مەن بالا پروبلەماسىن اتادى. «اتا-انالار بالالارىن ويلاۋ كەرەك. بىزدە قازىر بالاعا قامقورلىق ماتەريالدىق دەڭگەيدە عانا كورىنەدى - قانداي سمارتفون الۋ كەرەك، قاي مەكتەپتە نەمەسە ج و و- دا ءبىلىم الۋ كەرەك دەگەن سياقتى، ال ماحاببات پەن تاربيە كەيىنگە ىعىسقانى وكىنىشتى»، - دەيدى ول.

 

Tengrinews.kz