قازاقستاننىڭ ءاربىر ايماعىنىڭ اتاۋى قايدان شىققانىن زەرتتەۋ كەرەك - پرەزيدەنت
«باعدارلامادا «تۋعان جەر» جوباسى قامتىلعان. ەگەر دە ءبىز قازاقستاننىڭ ءاربىر ساي- سالاسىنىڭ، تاۋىنىڭ، جولىنىڭ، وزەندەرى مەن كولدەرىنىڭ اتاۋلارى قايدان شىققانىن زەرتتەپ جازاتىن بولساق، وندا قازاقتىڭ تاريحى ەشقاشان وشپەيدى. وتانىن ءسۇيۋ دەگەن كەزدە ەڭ الدىمەن ادامنىڭ ويىنا اتا- اناسى، تۋعان جەرى كەلەدى. ءبىز قانشا جاسقا كەلسەك تە، بالالىق شاقتاعى كەزدەر، سول ۋاقىتتا جۇرگەن جەرلەر كوز الدىڭنان كەتپەيدى جانە كوڭىلگە جىلىلىق ۇيالاتادى. سوندىقتان «تۋعان جەر» سياقتى جوبالارعا نەمقۇرايلى قاراماۋ كەرەك. تۋعان جەردىڭ توپىراعى، ءاربىر وسىمدىگى، جان- جانۋار دۇنيەسى ءبىز ءۇشىن وتە قىمبات. وتاندى، ەلدى ءسۇيۋ وسىدان باستالادى. سوندىقتان جاس ۇرپاقتى وسىنداي جاعدايدا تاربيەلەسەك دەپ ويلايمىن. قازىرگى كەزدە بۇل جۇمىستار بارلىق جەردە جۇرگىزىلىپ جاتىر»، - دەپ توقتالدى پرەزيدەنت.
بۇدان بولەك ەلباسى قازاقستاننىڭ كيەلى جەرلەرىنىڭ گەوگرافياسى جوباسىنا توقتالا كەلە، وسى رەتتە ەلىمىز اۋماعىندا دۇنيەجۇزىنە كورسەتىن كيەلى جەرلەر بارشىلىق ەكەنىن اتاپ ءوتتى. بۇل باعىتتاعى قادامدار ءتۋريزمدى دامىتۋعا ايرىقشا ۇلەسىن قوسادى.
ن. نازاربايەۆ وسى كۇنگە دەيىن قازاقستاننىڭ بارلىق تۇكپىرىندە، اتاپ ايتقاندا وڭىرلەردەگى اۋداندار مەن اۋىلداردا بولعانىن ەسكە سالدى.
سونداي-اق پرەزيدەنت الەمدەگى كورىكتى جەرلەردى ارالاپ شىققانىن ايتا كەلە، «مەن قازىر دەمالىسقا ەشقايدا بارعىم كەلمەيدى. ءقازىر بۋرابايدا وتىرمىز. بۇنداي كەرەمەت جەردى كەزدەستىرە بەرمەيسىڭ، ياعني تابيعاتى ساقتالعان ادەمى جەر. تاۋى دا، كولى دە بار. ءدال وسىنداي ورىندار شىعىس قازاقستاندا بار، ادامنىڭ اياعى باسپاعان جەرلەر كەزدەسەدى. الاتاۋدىڭ باۋرايى ءوز الدىندا بولەك»، - دەدى.
«سوندىقتان ءبىزدىڭ كيەلى جەرلەرىمىز بويىنشا قاجەتتى جۇمىستار اتقارىلىپ جاتىر. بۇل وتە كەرەك، سەبەبى وسىنىڭ بارلىعى وتانسۇيگىشتىككە، ءوز وتانىن بىلۋگە قاجەت»، - دەدى مەملەكەت باسشىسى.
