ەرتىس وزەنىندە سۋقۇزعىندار بالىقتاردى قۇرتىپ جاتىر - كەسكىن

استانا. قازاقپارات - پاۆلودار وبلىسى ماي اۋدانىنىڭ بالىقشىلارى دابىل قاعۋدا.

سوڭعى جىلدارى بۇل اۋماقتا بالىقتاردىڭ كوزىن قۇرتىپ جاتقان سۋقۇزعىنداردىڭ سانى كۇرت ارتىپ وتىر، دەپ حابارلايدى pavlodarnews.kz.

رەداكسياعا ۆيدەو جولداعان جەرگىلىكتى تۇرعىنداردىڭ ايتۋىنشا، ەرتىس القابىندا مىڭداعان قۇس مەكەندەيدى. ايگىلى قاناتتىلار كىشكەنتاي بالىقتاردى جەپ قويسا، ۇلكەندەرىن جاعاعا لاقتىرادى. پاۆلودار وبلىسى اۋماقتىق ورمان شارۋاشىلىعى جانە جانۋارلار الەمى ينسپەكسياسىندا سۋقۇزعىندارىنىڭ كوبەيۋىنە قاتىستى ماسەلەنى قازاقستاننىڭ عالىمدارى قاراستىرىپ جاتقانىن ايتتى. ءبىر اي بۇرىن ەرتىس وڭىرىندە وسى تاقىرىپقا بايلانىستى دوڭگەلەك ۇستەل وتكەن. وعان وبلىستىق اۋماقتىق ينسپەكتسيا، تابيعاتتى قورعاۋ پروكۋراتۋراسى، باياناۋىل اۋدانى ۇلتتىق پاركى، ورمان جانە جانۋارلار الەمىن قورعاۋ مەكەمەسى جانە «ەرتىس ورمانى» رەزەرۆاتىنىڭ وكىلدەرى، وڭىردەگى قورىقشىلار مەن كۇزەتشىلەر قاتىسقان.

«ەرتەڭ عالىمدارمەن بىرگە ماي اۋدانىنا شىعۋ جوسپارلانىپ وتىر»، - دەيدى اۋماقتىق ينسپەكتسياسى اڭشىلىق شارۋاشىلىعى جانە جانۋارلار الەمى ءبولىمىنىڭ باسشىسى ارمان مۇقاتايەۆ. «بۇل قۇستاردان تابيعاتقا قانداي دا ءبىر زيان كەلە مە ەكەنىن انىقتاعىمىز كەلەدى. ول ءۇشىن بيولوگيالىق زەرتتەۋ جۇرگىزىپ، ەكولوگيالىق ساراپتاماعا جىبەرۋ كەرەك. ازىرگە قۇستار ەرتىس القابىندا وزدەرىن جايلى سەزىنەدى. ءبىر سۋقۇزعىن تاۋلىگىنە ءبىر كەلىدەي بالىق جەيدى. مۇندا جاقسى قورەك بار، اڭشىلىققا تىيىم سالىنعان، ەشكىم قۇستاردى مازالامايدى. دەگەنمەن سۋقۇزعىندار پاۆلودار وبلىسىنىڭ اۋماعىندا ۇيا سالمايدى. ولار مۇندا ءۇش جىل بۇرىن پايدا بولعان. بۇل - قونىس اۋداراتىن قۇستار. بىزگە سەمەيدەن ۇشىپ كەلگەن. ەرتەڭگى تەكسەرىستى وتكىزۋگە ماي اۋدانىنىڭ قورىقشىلىق قىزمەتى ۇسىنىس جاسادى».

ازىرگە باسقا اۋدانداردان شاعىم تۇسپەگەن. دەسە دە، ەكولوگتار اشقاراق قۇستارعا قاتىستى ماسەلەنى شەشۋگە اسىقپايدى، سەبەبى سۋقۇزعىندارى رەسەيدەگىدەي جوعالىپ بارا جاتقان تۇرىنە كىرۋى مۇمكىن. قازاقستاندىق ساراپشىلار باسقا ەلدەردىڭ تاجىريبەسىن زەرتتەگەن. ماسەلە، بالتىق جاعاسىنداعى عالىمدار بۇل ماسەلەنى وتشاشۋلار ارقىلى شەشكەن. وتشاشۋدان قاتتى شوشىعان قۇستار ءتىپتى، ۇيالارىن تاستاپ ۇشىپ كەتكەن. پاۆلودار وبلىسىنا مۇنداي تاجىريبە جارامايدى، سەبەبى مۇندا ولاردىڭ ۇيالارى جوق. - قازىرگى تاڭدا سۋقۇزعىندارىن باقىلاناتىن قۇستاردان اڭشىلىق تۇرىنە ەنگىزۋ ماسەلەسى كوتەرىلۋدە، - دەيدى ينسپەكسيادا.