جاقىندا لاتىن الىپبيىنە قاتىستى عالىمدارمەن ءبىر جوباعا توقتايمىز - ق ر پرەزيدەنتى
مەملەكەت باسشىسى نۇرسۇلتان نازاربايەۆ «حابار» تەلەارناسىنا بەرگەن سۇحباتىندا وسىلاي ءمالىم ەتتى، دەپ حابارلايدى قازاقپارات.
«ەڭ ءبىرىنشى باستاعان جۇمىستاردىڭ اراسىنا قازاقتىڭ جاڭا ءالىپبيى ەندى. جالپى، جازبا تاريحىمىز وتە تەرەڭدە جاتىر. بۇل كيريلليتسادان كەتىپ قالۋ ساياساتىنان شىعىپ وتىرعان جوق، ياعني ول تۇبەگەيلى ماسەلە. كيريلليتسانىڭ ىشىندە بىزگە كەرەك ەمەس ارىپتەر بار. وسى ارىپتەردى پايدالانساق، ءبىزدىڭ ءتىلىمىزدىڭ نەگىزىن بۇزىپ جىبەرەدى. ەكىنشىدەن، لاتىن قارپىنە كوشكەندە ورىس تىلىنەن كەتۋ دەگەندى بىلدىرمەيدى. الىپقاشپا سوزبەن كەيبىر ساياساتكەرلەر وسىنى ايتادى، اسىرەسە، ورىس تىلىندە. ءالىپبي تەك قانا قازاقتىڭ تىلىنە بايلانىستى ماسەلە. ورىستىڭ تىلىندە كيريلليتسادا ورىس باسىلىمدارى شىعا بەرەدى»، - دەپ توقتالدى ەلباسى.
وسى ورايدا پرەزيدەنت ورىس ءتىلىن ءبىلۋ ەلىمىزگە كەرەك ەكەنىن، عىلىم مەن تەحنيكانىڭ كوزى بولىپ وتىرعان سالالار ورىس تىلىنە كوپ اۋدارىلعانىن، سوندىقتان بۇنداي مول دەرەك قورىنان اجىراپ قالۋعا بولمايتىنىن اتاپ ءوتتى.
ن. نازاربايەۆتىڭ سوزىنە قاراعاندا، لاتىنعا كوشۋ نەگىزدى ءارى ورىندى تۇردە جۇرگىزىلەتىن بولادى.
«مىسالى، ءبىزدىڭ زيالى قاۋىمنىڭ شىعارمالارى قالىپ قويۋى مۇمكىن دەگەن پىكىر بار. بۇل جەردە ەشقانداي ماسەلە جوق، قازىرگى ۋاقىتتا ءالىپبي جاڭادان ەنگىزىلسە، كومپيۋتەر ارقىلى قارىپتەردى تەز ارادا اۋدارىپ جىبەرۋگە بولادى. وسى تۇرعىدا مەنىڭ ەشبىر كۇمانىم جوق، ەشتەڭە دە ارتتا قالىپ قويمايدى»، - دەدى مەملەكەت باسشىسى.
بۇل رەتتە پرەزيدەنت ۇلكەن جۇمىس اتقارىلىپ جاتقانىن جەتكىزدى.
«جاقىندا ءبىر- ەكى ءماتىنىن قارايتىن بولامىن. وسىمەن اينالىسىپ جۇرگەن عالىمداردىڭ بارلىعىن جيناپ، ولارمەن بىرگە قاراپ، ءبىر ءىرى جوباعا توقتايتىن بولامىز»، - دەدى نۇرسۇلتان نازاربايەۆ.
مەملەكەت باسشىسىنىڭ پايىمىنشا، لاتىن الىپبيىنە كومپيۋتەردىڭ پەرنەتاقتاسىنا لايىقتالعان نۇسقا ارقىلى كوشۋگە بولادى.
«مەنىڭ ويىمشا، الدىمەن ءالىپبيدى دايارلاپ، جاريالاپ، بايىپپەن ەنگىزۋ كەرەك. جالپى ايتقاندا، قازىر بالالاردىڭ بارلىعى اعىلشىن ءتىلىن وقيدى. ونىڭ نەگىزىندە لاتىن قارپى. سوندىقتان ەشقانداي پروبلەما بولمايدى. بۇل ۇلكەن ساياسي ماسەلە جانە بارلىق ەلدەردە سولاي بولعان. ول قازاق ءتىلىنىڭ مۇددەسى، ياعني ءتىلدى ساقتاپ قالۋىمىز ءۇشىن جاساپ وتىرعان ۇلكەن تاريحي قادام»، - دەدى پرەزيدەنت.
