نۇرسۇلتان نازاربايەۆ: پرەزيدەنتتىك جۇيەنىڭ ارقاسىندا قازاقستاندى الدىڭعى قاتارعا الىپ شىقتىق
«ءبىزدىڭ كونستيتۋتسيامىزعا بيىل تۋرا 22 جىل تولادى. كونستيتۋتسيا دا ءتىرى ورگانيزم سەكىلدى زاماننىڭ تالابىنا ساي وزگەرىپ تۇرۋى كەرەك. ءبىز كونستيتۋتسيامىزعا وزگەرىس ەنگىزىپ، ىلعي دا دەموكراتيزاتسياعا قاراي، الەمنىڭ بارلىعى كەتىپ بارا جاتقان جولمەن ءجۇرىپ كەلەمىز. ءبارى دە پارلامەنت مەن ۇكىمەت ءۇشىن، زاڭنىڭ ۇستەم بولۋىن قامتاماسىز ەتۋ ماقساتىندا جاسالدى. دەمەك، كىم نە دەسە دە، اتالعان ءۇش باعىت دەموكراتيزاتسياعا قاراي جول سالدى. قازاقستاننىڭ باسىنان وتكەن اۋىرتپالىقتى كوپ كوردىك. قانداي جولمەن ءجۇرۋدى تالقىلادىق. پرەزيدەنتتىك بيلىك بىزگە اۋاداي قاجەت ەدى. ال ونداي جۇيە جوق ەلدەردىڭ ءبارىن بايقاپ كورىڭىز. ەشكىمدى رەنجىتىپ الماۋ ءۇشىن ول ەلدەردىڭ اتىن اتاعىم كەلمەيدى. دەمەك، مەملەكەت اياعىنان تىك تۇرىپ، تاۋەلسىز ءارى ىرگەسى بەرىك ەل بولۋ ءۇشىن ەڭ الدىمەن ءوز ىشىندە ءبارىن تارتىپكە كەلتىرۋى كەرەك. ءوز ىشىندەگى تۇراقتىلىقتى رەتتەپ العاننان كەيىن سىرتقى ەلدەر سىيلايتىنداي ەكونوميكالىق بازا قۇرىلادى. ودان كەيىن سىرتقى ساياساتتى تابىستى تۇردە جۇرگىزۋگە بولادى»، - دەدى قازاقستان پرەزيدەنتى.
نۇرسۇلتان ءابىش ۇلىنىڭ ايتۋىنشا، قازاقستان «الدىمەن ەكونوميكا، كەيىن ساياسات» باعىتىن دۇرىس تاڭداپ العان.
«سول كەزدەگى پرەزيدەنتتىك جۇيە ءوزىن-ءوزى اقتاپ، قازاقستاندى دامۋى شابان ەلدەردىڭ قاتارىنان الىپ شىقتىق. شىعىس ەۋروپا نەمەسە ازيا ەلدەرىندە ءبىز الدىڭعى قاتاردامىز. ول سوزىمىزگە ەشكىم دە تالاسا المايدى. دەمەك، بۇنىڭ ءبارى حالىققا قىسىم كورسەتپەگەن، ساياسي تۇرعىدا قۋعىن- سۇرگىنگە بارماعان، ءسوز بەن باسپا ءسوز بوستاندىعىن قامتاماسىز ەتكەن پرەزيدەنتتىك جۇيەنىڭ ارقاسى ەدى. ال ءقازىر وسى بازانىڭ نەگىزىندە كونستيتۋتسيادا جازىلعان پرەزيدەنتتىڭ 35 وكىلەتتىلىگى پارلامەنت پەن ۇكىمەتكە بەرىلدى. ۇشىنشىدەن، زاڭنىڭ قۇزىرلىلىعى ءۇشىن وسى جىلدار بويى كوپتەگەن جۇمىستاردى ءبىرجاقتى ەتتىك. زاڭعا ءبىرشاما وزگەرىستەر ەنگىزىلدى»، - دەيدى نۇرسۇلتان نازاربايەۆ.
