ءجۇز ميلليون جىل بۇرىن وسكەن گۇل تابىلدى

استانا. قازاقپارات - امەريكالىق عالىمدار ميانما جەرىنەن ءبىزدىڭ زامانىمىزعا دەيىنگى تاريحي كەزەڭ وسىمدىگىن تاپتى.

 تابىلعان گۇل وسىدان 100 ميلليون جىل بۇرىن ءوسىپ شىققان كۇيىندە ساقتالعان. «گۇلدىڭ كارىپتاس اراسىندا قالعانى ونىڭ جاقسى ساقتالۋىنا وڭ اسەرىن تيگىزگەن»، -  دەيدى ورەگون شتاتى ۋنيۆەرسيتەتىنىڭ پروفەسسورى دجوردج پوينار مىرزا. عالىمنىڭ بولجامى بويىنشا، سول زاماندا جەر بەتىن مەكەن ەتكەن دينوزاۆرلار وسىمدىك بۇتاعىن قاعىپ سىندىرۋ اسەرىنەن گۇلدى اراحاريالاردىڭ قابىعىنداعى شايىردىڭ تامشىلارىنا تۇسىرگەن بولۋى ابدەن مۇمكىن. ول قازىرگى كارىپتاستىڭ كوزى. اراۋكاريي ورماندارى وسىدان 100 ميلليون جىل بۇرىن قازىرگى ميانما تەرريتورياسىندا وسكەن. ول جەردى دينوزاۆرلار، سۇتقورەكتىلەر مەن جاندىكتەر مەكەن ەتكەن جانە العاشقى گۇل وسىمدىكتەرى دە وسى جەردەن شىققان. تابىلعان گۇل ديامەترى شامامەن 5 ميلليمەتر. وسىمدىك Tropidogyne pentaptera اتاۋىنا يە بولدى. مۇندا penta ءسوزى «بەس» دەگەن ماعىنا بەرسە، pteron ۇعىمى "قانات" دەگەن بالاماعا يە.

Massaget.kz