گۋگل باسشىسى قازاقستاندىق وقۋشىلارعا كەڭسە اشىپ بەرۋگە ۋادە ەتتى - فوتو
«قازاقپارات» ح ا ا ءتىلشىسى كوماندا وكىلدەرىمەن جۇزدەسىپ، باس جۇلدە العان موبيلدى قوسىمشانى قالاي ويلاپ تاپقاندارىن جانە Google باسشىسى سۋندار پيچايمەن كەزدەسۋدىڭ قالاي وتكەنىن سۇرادى.
بۇعان دەيىن الماتىداعى ا ق ش- تىڭ باس كونسۋلدىعى الەمنىڭ ءتۇرلى ەلدەرىنەن جينالعان كوماندالاردىڭ Technovation World Pitch سامميتىنە قاتىسقانىن حابارلاعان ەدى. قازاقستاننان ەكى الماتىلىق كوماندا قاتىستى. #MakerspaceAlmaty «/flash» كومانداسى جۇزدەگەن كوماندالاردىڭ اراسىنان توپ جارىپ، كرەمني القابىنداعى World Pitch Summit-تە ءوز يدەيالارىن تانىستىردى.
«/Flash» - ارۋجان قوشقاروۆا، اجار سۇلتانسىيىق، ديانا جاناقبايەۆا جانە ديارا بەيسەنبەكوۆا اتتى ءتورت مەكتەپ وقۋشىسىنان قۇرالعان كوماندا. ولار ايلار بويى ءوز ۇستازدارىمەن زەرتتەۋ جۇرگىزىپ، QamCare - جاسوسپىرىمدەردىڭ قاۋىپسىزدىك دەڭگەيىن كوتەرەتىن ءموبيلدى قوسىمشانى جاساپ شىعاردى. QamCare جاسوسپىرىمدەرگە توتەنشە جاعداي ورىن العاندا جاقىندارى مەن تۋىستارىنا ءوز GPS دەرەكتەرىن جىبەرۋگە مۇمكىندىك بەرەدى. QamCare قوسىمشاسىنىڭ اتاۋى قازاقتىڭ «قامقور» سوزىنەن شىققان.
«MakerspaceAlmaty - الماتىداعى امەريكالىق ەلشىلىكتىڭ جانە «Shevron» كومپانياسىنىڭ بىرلەسكەن جوباسى. مەن وندا روبوت تەحنيكاسى مەن باعدارلامالاۋ نەگىزدەرىنەن ساباق بەردىم. وندا بارلىق تىلەك بىلدىرۋشىلەر تەگىن ءبىلىم الا الادى. ارۋجان - روبوت تەحنيكاسىنا، ديانا مەن اجار «باعدارلامالاۋدى» ۇيرەنىپ ءجۇردى. 2016 -جىلدىڭ كۇزىندە Technovation بايقاۋىنا قاتىسۋدى ۇيعاردىم. بۇل 10-18 جاس ارالىعىنداعى قىزدارعا ارنالعان كونكۋرس، ونىڭ ماقساتى - قىزداردىڭ تەحنولوگيالارعا دەگەن قۇشتارلىعىن وياتۋ. سول ساتتە كوماندا جاساقتاۋدى ۇيعاردىم»، - دەيدى كوماندا مەنتورى ازيزا يبراگيموۆا.
ونىڭ ايتۋىنشا، كوماندا جينالعان سوڭ، قىزدار بايقاۋعا جاڭا يدەيا ىزدەي باستادى. ازيزا يبراگيموۆا QamCare-گە دەيىن سۋيتسيدتىڭ الدىن الاتىن قوسىمشانىڭ دا ازىرلەنگەنىن ايتادى.
«ءبىر كۇنى الماتىدا 11 جاسار بالانىڭ جوعالىپ كەتكەنى تۋرالى جاڭالىقتى وقىدىق. ونى وگەي شەشەسى ۇرلاپ اكەتكەن كورىنەدى. بۇل وقيعا بىزگە قاتتى اسەر ەتتى جانە قاۋىپسىزدىك بويىنشا قوسىمشا قۇرۋدى ۇيعاردىق. نارىققا تالداۋ جۇرگىزە وتىرىپ، قانداي ءموبيلدى قوسىمشالاردىڭ بار ەكەنىن، قاي تۇستارىن تولىقتىرۋ قاجەتتىگىن كوردىك. ءبىز ءوز قوسىمشامىزدى جاساپ شىعاردىق جانە قاشىقتىقتان باسقارىلاتىن «SOS» باتىرماسىن جاسادىق»، - دەپ ءتۇسىندىردى ازيزا.
موبيلدى قوسىمشانىڭ جۇيەسىنە تىركەلگەن سوڭ، «وتباسىلىق توپ» ءبولىمىن تاڭداپ، وندا سەنىمدى تۋىستاردىڭ بايلانىس تەلەفوندارى جازىلادى. بالا ۇيدەن مەكتەپكە نەمەسە مەكتەپتەن ۇيگە قايتاردا باعدارلامانى ىسكە قوسۋعا بولادى.
«قاۋىپ تونگەن جاعدايدا «SOS» باتىرماسىن قولدانا الاسىز. ەگەر بۇل باتىرمانى ابايسىزدا باسىپ قويساڭىز، قىزمەتتەن باس تارتۋ ءۇشىن 10 سەكۋند ۋاقىتىڭىز بار. 10 سەكۋندتان كەيىن «ماعان ءقاۋىپ ءتوندى» دەگەن سىڭايداعى حابارلاما تۋىستارىڭىزعا جىبەرىلەدى. كەيىنىرەك، تەلەفوننىڭ سومكەدە جاتاتىنىن، توتەنشە جاعدايدا بالانىڭ تەلەفوندى الىپ ۇلگەرمەيتىنىن ويلادىق. مۇنداي وقيعالار ءۇشىن الاقانعا سىيىپ كەتەتىن كىشكەنتاي باتىرمانى جاسادىق. بۇل باتىرما Bluetooth ارقىلى تەلەفونمەن بايلانىسادى»، - دەيدى ا. يبراگيموۆا.
ونىڭ ايتۋىنشا، QamQare قوسىمشاسى بيىلعى كۇزدە جۇرتشىلىققا ۇسىنىلادى. بۇل قوسىمشاعا Google باسشىسىنىڭ ءوزى قىزىعۋشىلىق تانىتقان.
«ماراپاتتاۋ راسىمىنەن بۇرىن تانىمال بيزنەسمەندەرگە ءوز جوبامىزدى تانىستىرۋ مۇمكىندىگى تۋدى. ولاردىڭ ءبىرى سۋندار پيچاي ەدى. ءبىزدىڭ ستەندىمىزدىڭ جانىندا ۇزاق ۋاقىت تۇردى. قىزداردىڭ يدەياسىنا جوعارى باعا بەردى»، - دەيدى كوماندا باسشىسى.
كوماندا مۇشەسى ارۋجان قوشقاروۆا Google باسشىسىمەن جەكە كەزدەستى. ونىڭ قابىلداۋىنا ءار كوماندادان ءبىر عانا ادام بارىپ، ءوز سۇراقتارىن قويا الادى.
«وندا جەڭىل جانە قيىن سۇراقتار قويىلدى. مەن ودان IT سالاسىنداعى ايەلدەرگە قولداۋ ءبىلدىرۋ ءۇشىن قانداي شارالار جزۇرگىزىلىپ جاتىر دەپ سۇرادىم. «Google ناعىز سەن باراتىن ورىن» دەپ جاۋاپ بەردى. ءبىزدىڭ سۇراعىمىز اياقتالعان سوڭ، ول ءوز سۇراقتارىن قويا باستادى. بىزدەن «Google» كورپوراتسياسى ارى قاراي نە ىستەۋ كەرەك دەپ سۇرادى. «قازاقستاندا ءوز كەڭسەسىن اشۋ» دەپ جاۋاپ بەردىم. ول كەلىستى. (...) مەن ونى سالماقتى دەپ ويلايتىنمىن. كەرىسىنشە، ول ءوزىن اشىق ۇستاۋعا تىرىستى. بارلىعىمىزعا جاقسى اسەر قالدىردى»، - دەيدى ارۋجان.
ارۋجان - «FLEX» (Future Leaders EXchange) - جوعارى مەكتەپ وقۋشىلارىنا ارنالعان كوممەرتسيالىق ەمەس الماسۋ باعدارلاماسىنىڭ فيناليسى. بۇل باعدارلاما بويىنشا قازاقستاندىق وقۋشىلار ءبىر جىل امەريكالىق مەكتەپتە وقيدى جانە امەريكالىق وتباسىمەن بىرگە تۇرادى. ارۋجان ا ق ش- تاعى IT- سالانىڭ دامۋى تۋرالى وتە جاقسى بىلەدى.
«ا ق ش- تىڭ ءبىلىم وردالارىنداعى اقپاراتتىق تەحنولوگيالار سىنىپتارىندا قىزدار وتە كوپ. ال بىزدەگى ۋنيۆەرسيتەتتەردە مۇنداي ماماندىقتارداعى قىزدار ساۋساقپەن سانارلىق. نەگە قازاقستاندا IT- مەن اينالىساتىن قىزدار از؟»، - دەيدى ارۋجان.
