بۇگىن قانات يسلام جانكۇيەرلەرى ءۇشىن اشىق جاتتىعۋ وتكىزەدى
ساعات 18:30 دا وتەتىن اشىق جاتتىعۋعا قانات يسلامنان وزگە جانقوش تۇراروۆ، جانىبەك ءالىمحان ۇلى، رۋسلان مىرساتايەۆ، ايدوس ەربوسىن ۇلى، نۇرسۇلتان جاڭابايەۆتار دا ءوز شەبەرلىكتەرىن كورسەتەتىن بولادى.
شارا اياسىندا جانكۇيەرلەرگە بوكسشىلارمەن سۋرەتكە ءتۇسىپ، قولتاڭبا الۋعا تاماشا مۇمكىندىك تۋىپ تۇر.
ەسكە سالايىق، 9- قىركۇيەك كۇنى استاناداعى «سارىارقا» ۆەلوترەگىندە جوعارىدا اتى اتالعان جانە وزگە دە بوكسشىلارىمىز «ەكسپو-2017» كورمەسى اياسىندا وتەتىن بوكس كەشىندە ونەر كورسەتەدى. باستى جەكپە-جەك قانات يسلام مەن (24-0,19 ك و) كانادالىق برەندون كۋكپەن (18-0, 11 ك و) اراسىندا وتەدى. بوكسشىلار ءبىرىنشى ورتا سالماقتاعى IBF تيتۋلىنا ۇمىتكەرلىككە تالاسادى. سونداي-اق وسى جەكپە-جەكتىڭ اندەركارتىندا قازاقستاندىق 8 بوكسشى شارشى الاڭعا شىعادى.
ولار - جانقوش تۇراروۆ (21-0, 15ك و)، جانىبەك ءالىمحان ۇلى (1-0, 1 ك و)، مەيىرىم نۇرسۇلتانوۆ (3-0,2 ك و)، رۋسلان مىرساتايەۆ (3-0, 3 ك و)، ءالي احمەدوۆ (7-0,5 ك و)، ايدوس ەربوسىن ۇلى (6-0, 6 ك و)، ديماش نيازوۆ (11-0-3, 5 ك و) جانە نۇرسۇلتان جاڭابايەۆ.
اۆتور: كۇنسۇلتان وتارباي
