الماتى حايۋاناتتار باعىندا جانۋارلارعا جايلى جاعدايلار جاسالۋدا

الماتى. قازاقپارات - الماتى حايۋاناتتار باعىندا امۋر جولبارىستارىنا ارنالعان تەمىر تورلاردى قايتا جوندەۋ جۇمىستارى باستالدى، دەپ حابارلايدى قازاقپارات ءتىلشىسى.

«كەزەك جولبارىستارعا دا كەلىپ جەتتى. بۇل تاماشا جانۋارلاردىڭ ءۇيىن جوندەپ بەرەتىن دە ۋاقىت كەلدى. ءبىزدىڭ ۋرماننىڭ (جولبارىس - رەد.) جۇبى جاقىندا كەلەدى. ەندى ولاردا كوگال، الاڭقاي، حاۋىز، سارقىراما، ويىنشىقتار الىنادى، قازىرگى تۇرمەگە ۇقساعان توت باسقان تەمىر توردان قۇتىلامىز. زووباق تۇرمە ەمەس، ول - ساياباق»، دەپ جازدى الماتى زووباعىنىڭ ديرەكتورى ەرجان ەركىنبايەۆ الەۋمەتتىك جەلىسىندەگى جەكە پاراقشاسىندا.

قازىرگى ۋاقىتتا، اق ايۋ مەن گيمالاي ايۋىنا عانا ەمەس، ءمۇيىزتۇمسىق پەن پىلدەرگە دە قورشاۋ مەن كۇركە جاسالدى. سونداي-اق، جاعىمسىز يىستەردەن تازارتۋ ءۇشىن ارنايى جۇيەلى شارالار اتقارىلاتىن بولادى.