شپەكبايەۆ جەمقورلىقتى جويۋعا نەمقۇرايلى قاراعان مينيسترلىكتەردى اتادى

استانا. قازاقپارات - ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى ءتوراعاسىنىڭ ورىنباسارى اليك شپەكبايەۆ مەملەكەتتىك ورگاندارداعى سىبايلاس جەمقورلىققا يتەرمەلەيتىن سەبەپتەردى جويۋ بويىنشا جوسپار ازىرلەۋدى تاپسىردى، دەپ حابارلايدى قازاقپارات.

بۇل تۋرالى قوعامدىق مونيتورينگ جانە سىبايلاس جەمقورلىق تاۋەكەلدەرىن تالداۋ قورىتىندىلارىنا ارنالعان جينالىستا مالىمدەدى.

«اكىمشىلىك كەدەرگىلەر، زاڭنامالىق اكتىلەر، سىبايلاس جەمقورلىققا قارسى ارەكەت ەتۋ ماسەلەلەرىنىڭ بارلىعىن شەشۋگە بولادى. بۇل ەڭ الدىمەن، اتالعان قۇرىلىمداردى باسقاراتىن جەتەكشىلەردىڭ مۇددەلىلىگىنە بايلانىستى. وكىنىشكە وراي، اۋىل شارۋاشىلىعى جانە قارجى مينيسترلىگىنە جىبەرگەن ۇسىنىمدارىمىزدىڭ ورىندالۋ بارىسىنا الدىن الا تالداۋ جۇرگىزگەندە، اتالعان مەملەكەتتىك ورگانداردىڭ نەمقۇرايلى قاراعانىن كوردىك. بۇعان جول بەرۋگە بولمايدى، سەبەبى جەمقورلىق سەبەپتەرىن جويۋعا كەدەرگى جاسايتىن كەز كەلگەن ارەكەت جەمقورلىققا يتەرمەلەۋ بولىپ باعالانادى»، - دەدى اليك شپەكبايەۆ.

اگەنتتىك ءتوراعاسىنىڭ ورىنباسارى ەنگىزىلگەن ۇسىنىمداردىڭ تولىق ورىنداۋىن قامتاماسىز ەتىپ، باقىلاۋ قاجەتتىلىگىنە توقتالدى.

«جەمقورلىق قاۋىپتەرىن تالداۋ بويىنشا جول كارتاسىن ءبىز كورسەتكەن ۇسىنىمدارداعى سەبەپتەردى جويۋ بويىنشا ناقتى جوسپار الماستىرۋى كەرەك. ول ءۇشىن جەمقورلىققا قارسى ساياسات دەپارتامەنتىنە سايكەس قۇجاتتى ازىرلەپ، بەكىتۋگە جىبەرۋىن تاپسىرامىن»، - دەدى ءتوراعا ورىنباسارى.

سونىمەن بىرگە، اليك شپەكبايەۆ ساراپتاما ناتيجەسىن تانىستىردى. وندا ادىلەت مينيسترلىگىنە تۇسەتىن ءاربىر ەكىنشى ارىزدىڭ سوت اكتىلەرىنىڭ ورىندالۋىنا بايلانىستى ەكەنى كورسەتىلگەن. ياعني، 7378 ارىزدىڭ 3798 ءى نەمەسە %51,4 ى سوت اكتىلەرىن ورىنداۋ بويىنشا دەپارتامەنتتىڭ قىزمەتىنە تۇسكەن.

رەسمي دەرەكتەرگە سايكەس، سوت اكتىلەرىنىڭ ناقتى ورىندالۋى 43 پايىزدى عانا قۇرايدى، 298 مۇلىككە قاتىستى ىستەردىڭ 128 ءى ورىندالعان. قايتارىلعان شىعىن سوماسى - %38، ياعني 2,8 ميلليارد تەڭگەنىڭ 1 ميللياردى قايتارىلعان.

اۆتور: ايجان سەرىكجان قىزى