وتاندىق كونديتەرلەر رەسەيمەن نەلىكتەن باسەكەلەسە الماي جاتىر؟

الماتى. قازاقپارات - بۇگىن الماتىدا قازاقستاندىق كونديتەرلەردىڭ العاشقى فورۋمى ءوتتى.

جيىن بارىسىندا اتالمىش سالاداعى وزەكتى ماسەلەلەر تالقىلاندى، دەپ حابارلايدى قازاقپارات ءتىلشىسى.

قازاقستان كونديتەرلەر قاۋىمداستىعىنىڭ پرەزيدەنتى ءاليحان تالعاتبەك وتاندىق وندىرۋشىلەردىڭ نەلىكتەن باسەكەگە قابىلەتسىز ەكەندىگىن ءتۇسىندىردى. ونىڭ ايتۋىنشا، ماسەلە ءونىمنىڭ شيكىزاتتىق قۇرامىندا.

«رەسەيلىك ۆافليلەردىڭ باعاسى وتە ارزان. سەبەبى، ونىڭ قوسپاسىنىڭ 70 پايىزى مايلاردان تۇرادى. مۇنداي شيكىزات ارزان كەلەدى. سوندىقتان دا تاۋاردىڭ باعاسى ارزان. ءبىراق ونداي ءونىمدى جەۋگە كەڭەس بەرمەيمىن. كوبىنە مايلار ادام اعزاسىنا زياندى. ال ءبىزدىڭ وتاندىق ونىمدەردىڭ قوسپالارى 80 پايىز تابيعي ونىمدەردەن، داندەردەن، شوكولادتار مەن تاعى باسقالاردان جاسالادى. سوندىقتان، ءبىزدىڭ ونىمدەر قىمبات كەلەدى. ءبىزدىڭ ءوز ساتىپ الۋشىلارىمىز بار. ءبىراق ارزانعا دا كليەنت تابىلادى»، - دەدى ءاليحان تالعاتبەك.

ماماننىڭ ايتۋىنشا، رەسەيلىك وندىرۋشىلەر ءونىمنىڭ سىرتقى قورابىنا، ماركەتينگكە، ديزاينعا كوپ اقشا سالادى.

«سىرتقى ورامعا شىعىن اجەپتاۋىر كەتەدى. ماسەلەن، شوكولادتاردى وراۋ كەرەك بولسا، ول قىمباتقا تۇسەدى. ال كامپيتتەردى وراۋ ءۇشىن جۇقا قاعاز جەتكىلىكتى دەگەن سياقتى. سىرتقى ورام ءونىم قۇنىنىڭ 15 پايىزىن الادى»، - دەدى ول.

جۇرگىزىلگەن تالداۋلارعا سايكەس، وتاندىق كونديتەرلىك نارىقتىڭ 49 پايىزىن ءوز وندىرۋشىلەرىمىز قامتىسا، قالعانى رەسەي مەن ۋكراينانىڭ ەنشىسىندە ەكەن. بۇگىنگى تاڭدا كونديتەرلىك وندىرۋشىلەر 180 مىڭ توننا ءونىم وندىرەدى، ونىڭ 60 مىڭ تونناسى سىرتقا شىعارىلادى. 120 مىڭ توننا ءونىم قازاقستاندا ساتىلادى.