قازاقستاندا پوليتسەيلەرگە قىزمەتتىك كولىگىنىڭ تەرەزەسىن تۇمشالاۋعا تىيىم سالىندى
ىشكى ىستەر مينيسترلىگىنىڭ جاڭا ءتارتىبىن بۇزعان ساقشىلار شەتىنەن تارتىپتىك جازاعا تارتىلماق دەپ حابارلايدى «ك ت ك» ارناسى.
«جول پاترۋلدىك پوليتسيانىڭ قىزمەتتىك اۆتوكولىكتەرىنىڭ ارتقى جانە جانىنداعى اينەكتەرىن قاراڭعىلاۋعا تىيىم سالىندى. بۇل شارالار پوليتسيانىڭ ازاماتتارعا قولجەتىمدىلىگىن، قىزمەتىنىڭ ايقىندىعىن قامتاماسىز ەتۋگە باعىتتالعان. ارنايى تۇستەرمەن ايشىقتالعان جانە جارىق، دىبىس سيگنالدارىمەن جابدىقتالعان اۆتوكولىكتەرگە وسىنداي تالاپ قويىلىپ وتىر»، - دەيدى ءى ءى م مەملەكەتتىك ءتىل جانە اقپارات دەپارتامەنتىنىڭ ديرەكتورى الماس سادۋبايەۆ.
ياعني، پوليتسەيلەر مىنگەن كوك تۇسپەن بويالعان كولىكتەردىڭ بارلىق اينەگى اشىق بولۋى ءتيىس. استانالىق ساقشىلار جاڭا تارتىپكە جىلدام كوشىپ ۇلگەرىپتى. تەمىر تۇلپارلارىنىڭ تەرەزەسىندەگى قارا پەردەنى تۇگەل شەشىپ تاستاعان.
ىشكى ىستەر مينيسترلىگى وسى ارقىلى ءتارتىپ ساقشىلارى اراسىنداعى پاراقورلىقتى جويماق. ەندى پوليتسەيلەر ەرەجە بۇزعان جۇرگىزۋشىنى كولىكتىڭ ارتقى ورىندىعىنا وتىرعىزىپ، جاسىرىن سويلەسە المايدى دەگەن ءسوز.
ايتا كەتۋ كەرەك، ەلىمىزدە قاراپايىم كولىك جۇرگىزۋشىلەرىنە دە تەرەزەسىن تۇمشالاپ جۇرۋگە تىيىم سالىنعان.
