اشۋعا مىنگەن دەنساۋلىق ساقتاۋ ءمينيسترى شەنەۋنىكتەردى جۇمىستان قۋماق
ءمينيستردىڭ قارا تىزىمىنە الماتى، سولتۇستىك قازاقستان جانە قوستاناي وبلىستارى كىرىپ وتىر. ءتىپتى مەملەكەتتىك «دەنساۋلىق» باعدارلاماسى دا ءجوندى ىسكە اسپاي جاتىر ەكەن.
ادەتتە ءوزىن وتە سابىرلى ۇستايتىن مينيستر وڭىرلەردەگى ارىپتەستەرىنىڭ جۇمىسىنا قاراپ، قاتتى ءتۇڭىلدى. ماسەلەن، قىرۋار قارجى جۇمسالعان «دەنساۋلىق» باعدارلاماسى ءبىر دە ءبىر وبلىستا تولىق جۇزەگە اسىرىلماعان.
ءبىرتانوۆتىڭ كۇرسىنەتىندەي ءجونى بار. ويتكەنى قاراماعىنداعىلارى شارۋانى ماندىتا الماي وتىر. ماسەلەن، قوستاناي وبلىسىندا قاتەرلى ىسىك، جۇرەك، تۋبەركۋلەز اۋرۋىنا شالدىققاندار كوبەيگەن. ونىڭ سەبەبىن ايتقان شەنەۋنىكتىڭ جاۋابى سەنىمدى شىعا قويمادى.
«قوستاناي وبلىسىندا بالالارعا قاراعاندا ەگدە جاستاعى ادامدار ەكى ەسە كوپ. سوندىقتان، وڭىردە ءولىم-ءجىتىم دەڭگەيى دە جوعارى. ونىڭ ۇستىنە سۋيدتسيد جاساعانداردىڭ دا سانى كوبەيگەن. وڭىردە مامان جوقتىڭ قاسى»، - دەپ جاۋاپ بەردى قوستاناي وبلىستىق دەنساۋلىق ساقتاۋ دەپارتامەنتىنىڭ باسشىسى ەركەن داۋىتبايەۆ.
جاعدايىمىز ناشار دەپ، «جىلاعان» باسشىنى مينيستر تىيىپ تاستادى.
«وبلىستا مامان جەتىسپەيدى، مەديتسينالىق قۇرىلعىلار تاپشى. بۇل ماسەلەلەردىڭ بارلىعى مەملەكەتتىك باعدارلامادا قاراستىرىلعان. ءبىراق، ونى جۇيەلى تۇردە شەشەتىن باسشىنى دا كورىپ تۇرعان جوقپىن»، - دەيدى ەلجان ءبىرتانوۆ.
قوستانايدان بولەك، سولتۇستىك قازاقستان مەن الماتى وبلىسىندا دا جاعداي ءماز ەمەس. مەملەكەتتىك باعدارلامالاردى ورىنداۋ بويىنشا كوش سوڭىندا قالعان. سوندىقتان ناۋقاستاردان شاعىم كوپ. اق حالاتتىلار بولسا، وزگەرۋگە قۇلىقسىز. اشۋعا مىنگەن ءبىرتانوۆ بۇگىن ايماقتاعى ارىپتەستەرىنە سوڭعى ەسكەرتۋ جاسادى.
«وڭىرلەردەگى باسقارما باسشىلارى مىندەتىن اتقارا الماسا، مينيسترلىك تاعايىنداۋ كەزىندە بەرگەن كەلىسىمىنەن باس تارتادى. ەگەر جىل سوڭىنا دەيىن جاعداي جاقسارماسا، وبلىس اكىمدەرىنە باسشىلاردى قىزمەتتەن بوساتۋ تۋرالى ۇسىنىس جىبەرەمىز. قازىر دەنساۋلىق سالاسىنداعى ماسەلەلەردى ءتيىمدى شەشۋگە شاماسى جەتەتىن باسقا ماماندار جەتەدى»، - دەپ كەسىپ ايتتى ءبىرتانوۆ.
ءبىرتانوۆ دەنساۋلىق ساقتاۋ باسقارمالارىنىڭ باسشىلارىن تىكەلەي تاعايىنداماعانىمەن، مينيستر رەتىندە وبلىس اكىمى ۇسىنعان كانديداتتى جۇمىسقا الۋعا كەلىسىم بەرەدى. ويتكەنى، جەرگىلىكتى مەديتسينا وبلىستىق بيۋدجەتتەن قارجىلاندىرىلادى.
استانادان قاتاڭ ەسكەرتۋ الىپ قايتقان باسشىلاردىڭ ءۇش اي ۋاقىتى بار. وسى ارالىقتا ولار كەمشىلىكتەرىن تۇزەپ ۇلگەرمەسە، شەتىنەن جۇمىسسىز قالۋى ابدەن مۇمكىن.
سونداي-اق، مينيستر مەملەكەت ەسەبىنەن تەگىن بەرىلەتىن ءدارى-دارمەكتى ناۋقاستارعا تاراتقاندا دا اسا مۇقيات بولۋدى ەسكەرتتى. باسشىلار پرەپاراتتىڭ ءار امپۋلاسىنا باسىمەن جاۋاپ بەرەدى.
