الماتى اۋەجايىندا ىزدەۋدە جۇرگەن الاياق ايەل ۇستالدى

تالدىقورعان. قازاقپارات - اسا ءىرى كولەمدە الاياقتىق جاسادى دەگەن كۇدىكپەن ىزدەۋدە بولعان قاپشاعاي قالاسىنىڭ تۇرعىنى الماتى اۋەجايىندا قولعا ءتۇستى، دەپ حابارلايدى قازاقپارات ءتىلشىسى.

وبلىستىق ىشكى ىستەر دەپارتامەنتى باسپا ءسوز قىزمەتىنىڭ حابارلاۋىنشا، 50 جاستاعى ايەل ۇزاق ۋاقىت بويى قازاقستاندىق ءتارتىپ ساقشىلارىنان رەسەيدە جاسىرىنىپ جۇرگەن.

پوليتسيا ونى سانكت-پەتەربۋرگ قالاسىنان ۇشىپ كەلگەن ساتىندە ۇستادى. انىقتالعانداي قاپشاعاي قالالىق ىشكى ىستەر ءبولىمىنىڭ قىزمەتكەرلەرى كۇدىكتىنى جىلجىمايتىن مۇلىككە قاتىستى الاياقتىق جاساعانى ءۇشىن قىلمىستىق تەرگەۋ جۇرگىزۋدە.

ول ءوزىنىڭ الداپ-ارباۋ ارەكەتتەرىن 2014-2015-جىلدارى جاساعان. ءبىراق رەسمي تۇردە ايەلگە 2017-جىلى ءبىر توپ ءجابىر كورگەندەردىڭ ارىز شاعىمىنان كەيىن ىزدەۋ سالىنادى.

قازىرگى تاڭدا قىلمىستىق ىسكە جالپى سوماسى 4 ميلليون تەڭگە زالال كەلتىرىلگەن قاپشاعاي قالاسىنىڭ تۇرعىندارىنان 7 ارىز تىركەلگەن. جابىرلەنۋشىلەردىڭ ايتۋىنشا ايەل ءوزىنىڭ ساتىلىمعا قويعان پاتەرىنە الدىن-الا تولەم الىپ وتىرعان.

ءبىراق پاتەر ۇزاق ۋاقىتتان بەرى بانكتە كەپىلدىك رەتىندە تۇر. سونداي-اق ول جابىرلەنۋشىلەردى مەملەكەتتىك قىزمەتتە تانىستارى بار ەكەنىن العا تارتىپ، اقشالاي سىياقىعا پاتەر، جەر تەلىمدەرىن الىپ بەرەمىن دەپ الداپ سوققان.

قاپشاعاي قالالىق سوتىنىڭ شەشىمىمەن كۇدىكتى قاماۋعا الىندى. ءتارتىپ ساقشىلارى الاياق ايەلدەن ءجابىر كورگەندەر سانىنىڭ ارتۋى مۇمكىن ەكەندىگىن ايتۋدا.

اۆتور: سامال قابىشەۆا