قازاقستاندا ونەركاسىپ قالدىقتارىنىڭ مولشەرى ارتىپ بارادى

استانا. قازاقپارات - ق ر ەنەرگەتيكا ۆيتسە-ءمينيسترى عاني سادىبەكوۆ «پارنيكتىك گازدار مەن وزوندى بۇزاتىن زاتتاردى رەتتەۋ ماسەلەلەرى بويىنشا قازاقستان رەسپۋبليكاسىنىڭ كەيبىر زاڭنامالىق اكتىلەرىنە وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ۇسىندى، دەپ حابارلايدى «قازاقپارات» ح ا ا ءتىلشىسى.

ونىڭ ايتۋى بويىنشا، قازاقستاندا جينالىپ قالعان قاتتى تۇرمىستىق قالدىقتاردىڭ مولشەرى 100 ميلليون تونناعا جەتكەن. «قالعاندارى ونەركاسىپتىك قالدىقتار. ءبىز اتالعان قالدىقتاردىڭ مولشەرى ارتىپ كەلە جاتقانىن بايقاپ وتىرمىز. ونەركاسىپتىك قالدىقتاردى قايتا وڭدەۋ ماقساتىندا وڭدەۋشى كاسىپورىنداردىڭ ساقتاۋ مەرزىمىن وزگەرتۋدى دۇرىس دەپ ەسەپتەيمىز. قالدىقتار بويىنشا ماسەلەلەردى مەملەكەتتىك قولداۋ بار ماڭىزدى تىزىمگە ەنگىزۋدى ۇسىنامىز. سونىمەن قاتار، قالدىقتاردى ءقاۋىپتى جانە ءقاۋىپسىز دەپ ەكىگە جىكتەۋدى قاجەت دەپ بىلەمىز»، - دەدى ول ۆەدومستۆوارالىق وتىرىستا.

ۆيتسە-ءمينيستردىڭ سوزىنە سۇيەنسەك، ەكولوگيالىق كودەكسكە قالدىقتاردى 6 اي مەرزىمگە دەيىن ساقتاۋ تۋرالى وزگەرىستەر ەنگىزىلگەن. وكىنىشكە وراي، نورما تەك قانا قالدىقتى شىعارمايتىن، كادەگە اسىرۋ، قايتا وڭدەۋ، قالدىقتارىن زالالسىزداندىرۋ ءۇشىن باسقا ورىندارعا جونەلتەتىن كاسىپورىندارعا قاتىستى قولدانىلادى.

سونداي-اق عاني سادىبەكوۆ زاڭ جوباسى جالپى سالانىڭ دامۋىنا تىڭ سەرپىن بەرەتىنىن اتاپ ءوتتى.

«حالىقارالىق تالاپتارعا ساي كەلتىرۋ ءۇشىن اتالعان زاڭنىڭ جۇزەگە اسۋى قالدىقتارمەن جۇمىس اتقارۋ، ەكىنشى شيكىزات رەتىندە قولداناتىنداي ونى قايتا وڭدەۋگە قول جەتكىزىپ، جاسىل ەكونوميكا كونتسەپتسياسىنا وتۋگە مۇرىندىق بولادى»، - دەپ ءتۇيدى ۆيتسە-مينيستر.

اۆتور: ايان بەكەن ۇلى