يسپانيادا بارسەلوناداعى تەراكتىگە بايلانىستى ازا تۇتۋ كۇنى جاريالاندى

بۇل تۋرالى كورولدىكتىڭ پرەمەر- ءمينيسترى ماريانو راحوي مەملەكەتتىك قاۋىپسىزدىك قىزمەتىنىڭ وكىلدەرىمەن بولعان ماجىلىستەن ءمالىم ەتتى، دەپ حابارلايدى ريا نوۆوستي. يسپانياداعى مەملەكەتتىك ورگانداردىڭ بارلىعىندا مەملەكەتتىك تۋلار تومەن تۇسىرىلەدى. «زارداپ شەككەندەردىڭ جاقىندارى مەن تۋىستارى قازىر ءبىز ءۇشىن باستى ماسەلە. بارسەلونالىقتار تارتقان زارداپتى قازىر مادريد، پاريج، بريۋسسەل، نيسسا، لوندوندىقتار دا سەزىنىپ وتىر»، - دەدى پرەمەر- مينيستر ءوزىنىڭ سوزىندە.

«ءبىز سونىمەن قاتار بىرلىكتىڭ، پوليتسيا وپەراتسيالارىنىڭ، حالىقارالىق قولداۋ مەن وركەنيەتتىڭ قۇندىلىقتارىن تاباندى قورعاۋ نيەتىنىڭ ارقاسىندا تەررروريزمدى جەڭۋگە بولاتىنىن بىلەمىز»، - دەدى ول. راحوي بولعان وقيعانى «جيحاد تەرروريزمى» دەپ اتادى جانە وعان جاھاندىق دەڭگەيدە جاۋاپ بەرۋ قاجەتتىگىن ايتتى.

«بۇگىندە تەرروريزممەن كۇرەس ەركىن، اشىق قوعامنىڭ جانە ءبىزدىڭ باسىمدىعىمىز بولىپ وتىر. بۇل جاھاندىق دەڭگەيدەگى قاتەر. وسىعان قاراي وعان بەرىلەتىن جاۋاپ تا جاھاندىق دەڭگەيدە بولۋى ءتيىس»، - دەدى ول.

كەشە، 17 -تامىز كۇنى شاعىن اۆتوبۋس بارسەلونانىڭ ورتالىعىنداعى رامبلا كوشەسىندە جاياۋ جۇرگىنشىلەردى باسىپ ءوتتى. سوڭعى مالىمەتتەر بويىنشا، 13 ادام قۇربان بولىپ، 100 ادام زارداپ شەكتى. جۇرگىزۋشى وقيعا ورنىنان بوي تاسالاپ ۇلگەردى. كۇدىكتى ەكى ادام تۇتقىندالدى، ولار سولتۇستىك افريكا تۇرعىندارى ەكەنى بەلگىلى بولدى. تەراكت ءۇشىن جاۋاپكەرشىلىكتى «يسلام مەملەكەتى» ۇيىمىنىڭ وكىلدەرى مويىندارى الدى.

اۋدارما: ايدار وسپاناليەۆ