نۇرسۇلتان نازاربايەۆ: لاتىن ارپىنە كوشۋ بۇل تەك قازاقتىڭ تىلىنە قاتىستى ماسەلە - كەسكىن

استانا. قازاقپارات - ەكسپو-نى قازاقستاندا وتكىزۋ قۇقىعىن جەڭىپ الۋ وڭايعا سوققان جوق.

بۇل تۋرالى مەملەكەت باسشىسى نۇرسۇلتان نازاربايەۆ «حابار» تەلەارناسىنا بەرگەن سۇحباتىندا ءمالىم ەتتى، دەپ حابارلايدى قازاقپارات.

قازاقستان پرەزيدەنتى سۇحبات بارىسىندا «ەكسپو-2017» حالىقارالىق مامانداندىرىلعان كورمەسىن وتكىزۋدىڭ ماڭىزدىلىعىن اتاپ ءوتتى.

«ەكسپو-2017 اسا ۇلكەن ماڭىزعا يە. كورمەنى قازاقستاندا وتكىزۋ قۇقىعىن جەڭىپ الۋ وڭايعا سوققان جوق. كورمە وتكىزىلەتىن ءۇش ايدا قازاقستانعا 2 ميلليون ادام كەلەدى دەپ توپشىلاعان ەدىك. ەكى ايدىڭ وزىندە 2,5 ميلليون ادام كەلدى. ەكسپونى تاماشالاۋ 20 ميلليونعا جۋىقتى قۇرادى»، - دەدى ق ر پرەزيدەنتى.

سونداي-اق، ەلباسى لاتىن قارپىنە كوشۋ ماسەلەسىنە دە توقتالدى.

«لاتينيتساعا كوشۋ ورىس تىلىنەن جانە كيريلليتسادان باس تارتۋدى بىلدىرمەيدى. بۇل تەك قازاقتىڭ تىلىنە قاتىستى ماسەلە. ورىس تىلىندە شىعارىلاتىن باسىلىمدار قاز-قالپىندا شىعا بەرەدى، ياعني قازاقستاننىڭ ورىس ءتىلدى ازاماتتارىنا كيريلليتسا قالدىرىلادى»، - دەدى مەملەكەت باسشىسى.

بۇعان دەيىن حابارلاعانىمىزداي، نۇرسۇلتان نازاربايەۆ «حابار» تەلەارناسىنا سۇحبات بەردى. ونىڭ بارىسىندا رۋحاني جاڭعىرۋ ۇدەرىسىنە قاتىستى وزەكتى سۇراقتارعا جاۋاپ بەرىپ، كونستيتۋتسيالىق رەفورمادان كۇتىلەتىن ناتيجەلەر جونىندە ايتتى.

سونداي-اق، قازاقستان پرەزيدەنتى «ەكسپو-2017» حالىقارالىق مامانداندىرىلعان كورمەسىن وتكىزۋدىڭ ماڭىزدىلىعىنا توقتالىپ، ونىڭ جۇمىسى اياقتالعاننان كەيىن كەشەن نىساندارىن پايدالانۋ جوسپارى تۋرالى وي ءبولىستى.

بۇدان بولەك، نۇرسۇلتان نازاربايەۆ وتاندىق ءتۋريزمدى دامىتۋدىڭ پەرسپەكتيۆالارى جانە وڭىرلەردەگى مادەني- تۋريستىك كلاستەردىڭ قالىپتاسۋى جونىندە اڭگىمەلەدى.

 

 ۆيدەونى ق ر پرەزيدەنتىنىڭ تەلەراديوكەشەنى ۇسىندى.