كەيبىر اۋە كومپانيالارى ۇشاقتارىنىڭ قايدا ەكەنىن بىلمەيدى

استانا. قازاقپارات - ازاماتتىق اۆياتسيا كوميتەتى ءتوراعاسى ورىنباسارىنىڭ مىندەتىن اتقارۋشى - باس مەملەكەتتىك اۆياتسيالىق ينسپەكتورى توتى ءامىروۆا اۋە كومپانيالارىنىڭ اۆياتسيالىق قاۋىپسىزدىك ەرەجەلەرىن بۇزۋىن توقتاتپاسا قاتاڭ شارالار قولداناتىندىعىن مالىمدەدى، دەپ حابارلايدى «قازاقپارات» ح ا ا ءتىلشىسى.

ازاماتتىق اۆياتسيا كوميتەتىنىڭ عيماراتىندا بۇگىن اۋە كومپانيالارىنىڭ باسشىلارى جينالدى. توتى ءامىروۆانىڭ ايتۋىنشا، كەيدە اۆياتسيالىق وقيعالاردى جاسىرىپ قالاتىن جاعدايلار كەزدەسەتىن كورىنەدى. سونىڭ سالدارىنان اۋە اپاتىنىڭ ورىن العانى جانە ونىڭ قۇرباندارىن كوميتەت ەلمەن بىرگە ەستىپ جاتادى.

«وسى سەبەپتى سىزدەردىڭ بارلىقتارىڭىزدى بۇگىن جيناپ وتىرمىز. قاۋىپسىزدىك ەرەجەلەرىنىڭ بۇزىلۋى جاعدايىنا ەشقانداي تۇسىنىستىكپەن قاراۋعا بولمايدى. جازا قولدانىلۋى كەرەك. جىل باسىنان بەرى ءۇش اۋە اپاتى تىركەلىپ، بەس ادام مەرت بولدى»، - دەدى توتى ءامىروۆا.

قازاقستاننىڭ باس اۆياتسيالىق ينسپەكتورىنىڭ ايتىپ وتىرعان ءۇش اۋە اپاتىنىڭ ەڭ العاشقىسى ش ق و اۋماعىندا تىركەلگەن بولاتىن.

25- اقپاندا اياگوز اۋدانىنىڭ اۋماعىندا «سترەكوزا 7-Gazelle SA341»  تىكۇشاعى قۇلاپ، ۇشقىش قازا تاپقان. ەكىنشى جاعداي بويىنشا 27- شىلدەدە الماتى وبلىسىندا ياك-12م ۇشاعىنىڭ اپاتىنان 2 ادام كوز جۇمسا، 10- تامىز كۇنى وقۋ-جاتتىعۋ بارىسىندا «تەحنام 2002» اۋە ۇشاعى تاعى سول الماتى وبلىسىندا قۇلاعان بولاتىن.

«مۇنى توقتاتۋ كەرەك. كەي جاعدايدا بىزگە ۇشاقتىڭ قۇلاعانى نەمەسە جانىپ جاتقانى تۋرالى جالعان اقپاراتتار كەلىپ ءتۇسىپ جاتادى. قايتا تەكسەرۋ جۇرگىزۋگە تۋرا كەلەدى. كەيدە ءتىپتى اۋە كومپانياسىنىڭ باسشىلارى ءبىر ساعات بويى ۇشاعىنىڭ قايدا كەتكەنىن بىلمەي جاتاتىن كەزدەر بار»، - دەيدى توتى ءامىروۆا.

ازاماتتىق اۆياتسيا كوميتەتىنىڭ ءتوراعاسىنىڭ ورىنباسارى مىندەتىن اتقارۋشى قاتاڭ شارالار قولدانىلماسا، اۋە كومپانيالارىن ليتسەنزياسىن ايىرۋ ماسەلەسى قارالاتىنىن جەتكىزدى.

اۆتور: ايان بەكەن ۇلى