استانادا قالدىقتاردان ەنەرگيا وندىرىلەدى - فوتو

بۇل تۋرالى بۇگىن ەكسپو-2017 اۋماعىندا استانا مەن الماتى وبلىسى اكىمدەرىنىڭ جانە ەنەرگەتيكا ۆيتسە- ءمينيسترىنىڭ «وپەراتور روپ» ج ش س، قازاقستاننىڭ ەكولوگيالىق ۇيىمدارىنىڭ باسشىلىعىمەن كەزدەسۋى بارىسىندا جاريا ەتىلدى.

«مەنىڭ ويىمشا، ەكسپو كورمەسى قالالاردىڭ دامۋىنا الدىڭعى قاتارلى تەحنولوگيالاردى ەنگىزۋ ءۇشىن ۇيىمداستىرىلعان سياقتى. مەملەكەت باسشىسى ەلىمىزدەگى ەكولوگيالىق جاعداي مەن جاسىل تەحنولوگيالاردىڭ قولدانىلۋىنا ەرەكشە ءمان بەرەدى. سوندىقتان، قازىر قالا اكىمدىگى استانا قالاسىنداعى قالدىقتاردى باسقارۋ جۇيەسىن جاڭارتۋدى كوزدەيتىن باعدارلاما جاساقتادى»، - دەپ اتاپ ءوتتى اسەت يسەكەشەۆ.

سونداي- اق، ول الەمدەگى قالدىقتى باسقارۋ جۇيەلەرىنىڭ كوز ىلەسپەس جىلدامدىقپەن دامىپ جاتقانىن باسا ايتتى.

«ءبىز قابىلداعان باعدارلاما قوقىستى جيناۋ، تاسىمالداۋ، وڭدەۋ جانە پوليگوندارعا كومۋ سىندى تۇتاس سيكلدى قامتيدى. قالا اۋماعى 24 بولىككە بولىنگەن، وندا 10 مىڭنان استام كونتەينەر ورناتىلعان. قاتتى تۇرمىستىق قالدىقتاردى شىعارۋعا كۇندەلىكتى 70-تەن استام ارنايى تەحنيكا جۇمىلدىرىلدى، مىڭداعان توننادان استام قالدىق شىعارىلادى»، - دەيدى اكىم.

قالا باسشىسى باعدارلامانىڭ ەكى كەزەڭدە جۇزەگە اسىرىلاتىنىن اتاپ ءوتتى. العاشقى كەزەڭ قازىرگى قوقىس وڭدەۋ كەشەندەرىن قوسىمشا تەحنولوگيالار ەنگىزۋ جولىمەن جاڭارتۋعا باعىتتالعان. ەكىنشى كەزەڭ ورگانيكالىق قالدىقتاردى اشىتۋ مەن قوقىس گازىن وڭدەۋ ارقىلى 2019 -جىلعا قاراي وڭدەۋ اۋقىمىن %75 عا دەيىن جەتكىزۋدى كوزدەيدى.