مەيرامبەك بەسبايەۆ: باستىقتاردى عانا «كۇتەتىن» جاعدايدا ءجۇرمىز

 ءانشى قازاقستاندا اسەم جەرلەردىڭ كوپ ەكەنىن، الايدا ونداعى قىزمەت كورسەتۋ ساپاسىنىڭ تومەندىگىن العا تارتتى. بۇدان وزگە، قىزمەت كورسەتۋشىلەردىڭ باستىقتاردىڭ الدىندا زىر جۇگىرىپ، قاراپايىم حالىقتى قان قاقساتاتىنىن ايتىپ سىنادى.

بۇل تۋرالى بەسبايەۆ Zhuldyz.tv ارناسىنىڭ «سەنبىلىك سەرۋەن» باعدارلاماسىنا بەرگەن سۇحباتىندا ايتتى.

«وتباسىڭمەن، دوستارىڭمەن دەمالعانعا ەشتەڭە جەتپەيدى عوي. جازدا مەن مىندەتتى تۇردە، شامام كەلگەنشە شەتەلگە بارىپ دەمالعاندى جاقسى كورەمىن. قازاقستاندا جاقسى جەرلەر، كەرەمەت جەرلەر كوپ. بۋرابايدان باستاپ سارىاعاشىمىزدى ايتايىق، وسكەمەندەگى قاتون- قاراعايدىڭ ءوزى نە تۇرادى؟ ! اتتەڭ، ءبىز ويلاعانداي باعا ەمەس. مەن ءوزىمدى ايتىپ تۇرعان جوقپىن، قاراپايىم حالىق ول جەردە دامالا المايدى.

سوسىن بىزدە سەرۆيس وسپەگەن. اقتاۋدا بولسىن... ۋداي باعاعا اناداي سەرۆيستە دەمالعانشا، تۇركياعا بارىپ، راحاتتانىپ 10 كۇن شومىلىپ كەلگەن جاقسى. باسىڭ دا اۋىرمايدى، ەشتەڭەگە جۇيكەڭدى جۇقارتپاي، قان قىسىمىڭ كوتەرىلمەي، جاقسى دەمالىپ كەلگەن جاقسى. ءوز ەلىمىزدە قانداي جەرلەرىمىز بار، قالاي سەرۆيستى كوتەرەمىز، مەن ءالى تۇسىنبەي ءجۇرمىن»، - دەيدى ءانشى.

بۇدان وزگە، بەسبايەۆ قىزمەت كورسەتۋشىلەردىڭ تانىمال تۇلعالار مەن باستىقتارعا ءجىتى كوڭىل بولەتىنىن ايتىپ قالدى. الايدا قاراپايىم حالىققا كەلگەندە ءبارى كەرىسىنشە دەپ اشىندى ءانشى.

 «ءوزىم قازاقستاندا دەمالىپ كوردىم، تىنىشتىق جوق. سوسىن مەنى تانىعاننان كەيىن بىردەڭەلەردى جاساپ جاتادى. ءبىراق باسقا قاراپايىم حالىقتان سۇرايمىن عوي... «وي، قۇرىسىن» ، - دەيدى ءبارى. ىلعي شاعىمداناتىندارى وسى. تەك باستىقتاردى عانا كۇتەتىن جاعدايدا ءجۇرمىز قازىر. ءالى سول. باستىق كەلە ما، ونىڭ تانىسى كەلە ما، ونى ءولتىرىپ كۇتەمىز. اۋزى- مۇرنىنان شىعارىپ، ءتىپتى، اقشاسىن الماي كەتەمىز. «ويباي، ۇيات. باستىق ايتقان بولمايدى. ءسىز تولەسەڭىز، رەنجيمىن» دەپ شىعارىپ سالادى ءبىزدىڭ قازاقتار. ال قاراپايىم حالىققا كەلگەندە وندايدى كورمەدىم»، - دەيدى مەيرامبەك بەسبايەۆ.