ءۇندىستاندا ايەلدەر تىلسىم كۇشتىڭ ەسىنەن تاندىرىپ شاشىن قيىپ كەتىپ جاتقانىن ايتىپ جار سالدى
استانا. قازاقپارات - ءۇندىستاننىڭ حاريانا مەن رادجاستحا شتاتىنىڭ ايەلدەرى پوليتسياعا الدەكىمنىڭ شاشىن قيىپ كەتىپ جۇرگەنىن ايتىپ شاعىمداندى.
«قاتتى جارىق ءتۇسىپ ەدى، ەسىمنەن تانىپ قالدىم. ءبىر ساعاتتان سوڭ ويانسام شاشىمدى قيىپ كەتىپتى» ، - دەيدى 53 جاستاعى سۋنيتا ديەۆي.
ول ءالى كۇنگە بەتى اشىلماعان ىسكە الاڭداۋلى.
شاش قيىپ كەتەتىن تىلسىم وقيعا العاش رەت شىلدە ايىندا رادجاستاندا پايدا بولدى. ودان كەيىن حاريانادا ايتىلا باستادى.
سۋنيتا ديەۆي ءالى كۇنگە ءوز وزىنە كەلە الماي ءجۇر. ونىڭ جانىندا ءبىر ادام وتىرىپ، كوڭىلىن اۋلاپ وتىرادى.
ونىڭ ۇيىنەن بىرنەشە مەتر جەردە تۇراتىن اشا ديەۆي دە وسىنداي شابۋىلعا ۇشىرادى. ول وزىنە ايەل ادامنىڭ تونگەنىن ايتادى.
ال، 28 جاستاعى رينا ديەۆي وزىنە مىسىقتىڭ شابۋىلداعانىن ايتتى.
«مەن ءۇي شارۋاسىمەن اينالىسىپ جۇرگەم. ءبىر كەزدە مىسىققا ۇقساس الدەنەنى بايقادىم. بىرەۋ مەنى ارقامنان تۇرتكەندەي بولدى، بۇرىلعان سوڭ نە بولعانى ەسىمدە جوق» ، - دەيدى رينا.
60 جاستاعى سۋندار ديەۆي شابۋىلدان سوڭ توسەكتەن تۇرا الماي جاتىر.
جەرگىلىكتى پوليتسەيلەر بۇل وقيعانى تەكسەرگەنىمەن ەشقانداي ايعاق تاپپادى. ولار تۇرعىندارعا قاڭقۋ اڭگىمەگە سەنبەڭدەر دەپ ناسيحات ايتۋدا.
تۇرعىنداردىڭ ءبىرى مۇنىڭ ارتىندا ۇيىمداسقىن توپ بار ەكەنىن، كەيبىرى تانتريك، ۆەدۋن وكىلدەرى ەكەنىن ايتادى. ادامار كوپ جاعدايدا سولارعا كومەك سۇراپ بارادى.
كەي ايەلدەر مۇنىڭ جوعارى تىلسىم يەسىنىڭ سالدارى ەكەنىن ايتسا، ەندى ءبىرى، تۇرعىنداردىڭ وقيعانى ويدان شىعارعانىن ايتىپ جاتىر.
جازۋشى- راتسيوناليست سانال ەدامارۋكۋدىڭ پايىمىنشا، بۇل قوعامدىق دەرت.
«ەشقانداي دا تىلسىم كۇشتىڭ اسەرى جوق. بۇل وقيعانى باستان وتكەرگەن ايەلدەر ىشكى پسيحولوگيالىق جانجالدان زارداپ شەككەندەر. ولار ەلدەن ەستىگەن اڭىمەسىن ءوزى باستا وتكەرگەندەي بولادى» ، - دەيدى ول.
