استانالىقتاردى لاتىن الىپبيىنە كوشۋ باستاماسىن كورمە ارقىلى قولداۋعا شاقىردى
اتالعان شارا «Men qoldaimyn» اتتى تاقىرىپپەن كيريلليسا نەگىزىندەگى قازاق ءالىپبيىن لاتىن الىپبيىنە كوشىرۋگە قولداۋ ءبىلدىرۋ ماقساتىندا وتكىزىلىپ وتىر، دەپ حابارلايدى «قازاقپارات» ح ا ا ءتىلشىسى.
كورمەگە وتكەن عاسىردىڭ 30-40 -جىلدارىنداعى قازاق جانە ورىس زيالى قاۋىم وكىلدەرىنىڭ لاتىن الىپبيىندە جازىلعان 100 گە جۋىق كىتابى قويىلعان. ولاردىڭ اراسىندا ا. قۇنانباي ۇلىنىڭ، ءى. جانسۇگىروۆتىڭ، س. تورايعىروۆتىڭ، ب. مايليننىڭ كىتاپتارى، م. اۋەزوۆتىڭ «تاس تۇلەك» كىتابى، س. كەڭەسبايەۆتىڭ «الىپپەسى»، ق. بەكحوجيننىڭ «ادەبيەتتىك وقۋ كىتابى»، ا. كابانوۆتىڭ «اناتومياسى»، ورىس جازۋشىلارى مەن ءتۇرلى عىلىم وكىلدەرىنىڭ قازاق تىلىنە اۋدارىلعان وقۋلىقتارى بار.
«ىلگەرى دامىپ كەتكەن تۇركيانىڭ تاريحىنداعى رەفورمالار كەزەڭىندە تۇرىكتەر ەڭ الدىمەن لاتىن الىپبيىنە كوشۋدى قولعا الدى. سول قاتارلى وزگەرىستى ەنگىزگەننەن كەيىن تۇركيا ءىرى مەملەكەتكە اينالىپ وتىر. 1929-1940 -جىلدارى قازاق ك س ر- دا لاتىن الىپبيىندە وقۋلىقتار دا، ادەبي كىتاپتار دا بولعان. مۇنىڭ ءبارى تاريحىمىزدا بار دۇنيە. بۇگىنگى تاڭدا ەلباسى ۇسىنىس جولداپ، الداعى ون جىلدا قازاقستاندا لاتىن الىپبيىنە ەۆوليۋتسيالىق جولمەن كوشۋ كوزدەلىپ وتىر. البەتتە، باستاپقى كەزەڭدە قيىنشىلىقتار بولۋى مۇمكىن. 2007 -جىلدان بەرى لاتىن الىپبيىنە ءوتىپ كەتكەن مەملەكەتتەردىڭ تاجىريبەسى زەرتتەلىپ كەلەدى. بولاشاقتى ويلاساق، لاتىن الىپبيىنە كوشۋىمىز كەرەك. بۇل كورمە ارقىلى حالقىمىزعا لاتىن ءالىپبيى بوتەن ەمەس ەكەنىن كورسەتە الامىز دەگەن ويدامىن»، - ق ر ۇلتتىق اكادەميالىق كىتاپحاناسىنىڭ عىلىمي حاتشىسى، تاريح عىلىمدارىنىڭ دوكتورى، پروفەسسور كامال بۋرحانوۆ.
ۇلتتىق اكادەميالىق كىتاپحانادا قازىرگى ۋاقىتتا وتكەن عاسىردىڭ 30-40 -جىلدارى جازىلعان 1000 عا جۋىق كىتاپ ساقتالعان. ولار كىتاپحانانىڭ ەرەكشە قورىنا ەنگىزىلگەن. ياعني، بۇل كىتاپتارعا رۇقساتسىز ەكىنىڭ ءبىرىنىڭ قولى جەتە بەرمەيدى. كورمەدە ءسوز سويلەگەن «قازاقستان-2050» جالپى ۇلتتىق قوزعالىسى» كەڭەسىنىڭ ءتوراعاسى مۇحتار مانكەيەۆ كورمەنىڭ كەشكە دەيىن جالعاساتىنىن ايتىپ، وڭىرلەردە وسى مازمۇنداس شارالاردى وتكىزۋگە شاقىراتىنىن حابارلادى.
اۆتور: ايان بەكەن ۇلى
