جارناماعا جالاڭاش ستيۋاردەسسالاردى تۇسىرگەن قازاقستاندىق كومپانيا ەلدى دۇرلىكتىردى - ۆيدەو
استانا. قازاقپارات - اۋە بيلەتتەرىن جالاڭاش ستيۋاردەسسالار ارقىلى جارنامالاعان Сhocofamily جانە Chocotravel كومپانيالارى قازنەتتى ءدۇر سىلكىندىرىپ، جەلى قولدانۋشىلارىنىڭ قاتاڭ سىنىنا ۇشىرادى دەپ حابارلايدى NUR. KZ.
بۇل تۋرالى جەلىدەگى پاراقشاسىندا تانىمال بلوگەر باقىتجان بۇقارباي جازدى.
«دوستار، اۋە بيلەتتەرىن ساتۋمەن اينالىساتىن ءبىر كومپانيامىز بورتسەرىك قىزداردى جالاڭاشتاندىرىپ، سەكسيستىك باعىتتاعى جارناما ءتۇسىرىپتى. ولاردىڭ بەينەروليگىمەن وسىندا بولىسپەيمىن، جارنامالاعىم كەلىپ تۇرعان جوق»، - دەيدى ول.
بلوگەر ولاردىڭ بەينەروليكتەگى قازاق قىزى ارقىلى الەۋمەتتىك جەلىلەردە وزدەرىنە جارناما جاساعىلارى كەلگەنىن العا تارتادى.
«بەينەروليككە قازاق قىزىن قوسىپ قويىپتى. تىر جالاڭاش. سوندا بۇلاردىڭ ماقساتى - قازاقتاردىڭ نامىسىن قوزدىرىپ، ولاردىڭ تاراپىنان الەۋمەتتىك جەلىلەردە ىزاعا تولى پوستتاردى كوبەيتىپ، وسىنىڭ ارقاسىندا پيارىن جاساۋ. بۇعان جول بەرمەيىك. قىزدارىمىزدىڭ قۇقىقتارى تاپتالىپ جاتقان كەزدە وسىنداي روليكتىڭ شىعۋى بارىپ تۇرعان ەسسىزدىك»، - دەپ جازادى بۇقارباي.
سونداي-اق، باقىتجان كومپانيانىڭ قىزمەتىنە ەڭ تومەن دەگەن باللدى قويىپ، قازاقستاندىقتاردى ءوز قارسىلىقتارىن بىلدىرۋگە شاقىردى.
«سوندىقتان وڭباعان كومپانيانىڭ فەيسبۋكتاعى Сhocofamily جانە Chocotravel پاراقشالارىنا كىرىپ، ەڭ تومەن 1 دەگەن باللدى قويۋعا شاقىرامىن»، - دەپ جازعان.
كومپانيانىڭ جەلىدەگى پاراقشاسىنا اشۋلى پىكىرلەرىن قالدىرىپ، ۆيدەو ءۇشىن كەشىرىم سۇراۋدى تالاپ ەتكەندەردىڭ سانى كوبەيۋدە.
