مەشىت جاشىكتەرىنە تۇسكەن ساداقا قايدا جۇمسالادى؟

استانا. قازاقپارات - قازاقستان مۇسىلماندارى ءدىني باسقارماسىنىڭ نايب ءمۇفتيى، «نۇر استانا» ورتالىق مەشىتىنىڭ باس يمامى ناۋرىزباي وتپەنوۆ مەشىت جاشىكتەرىنە تۇسەتىن قاراجاتتىڭ قايدا جۇمسالاتىنىن ايتىپ بەردى، دەپ حابارلايدى «قازاقپارات» ح ا ا ءتىلشىسى.

«قوعام بولعان سوڭ، ءتۇرلى پىكىردىڭ بولاتىنى زاڭدىلىق. قازىرگى ۋاقىتتا ءمۇفتياتقا قاراستى 2500 دەن استام مەشىت بار. ونىڭ بەس جۇزگە جۋىعى ءوزىن-ءوزى قامتاماسىز ەتە الادى. تۇسكەن ساداقامەن كوممۋنالدىق شىعىندارىن وتەيدى، قىزمەتكەرلەرىنە جالاقى بەرەدى. قالعان ەكى مىڭنان استام مەشىت دەمەۋشىلەردىڭ كومەگىنە مۇقتاج. بۇل مەشىتتەردى دەمەۋشىلەرگە حات جازىپ، حالىقتان كومەك سۇراۋ ارقىلى ۇستاپ وتىرمىز»، - دەدى ناۋرىزباي وتپەنوۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

ونىڭ ايتۋىنشا، ساداقاعا تۇسكەن قاراجات مەشىت شىعىندارى مەن قىزمەتكەرلەردىڭ ايلىق جالقاسىن تولەۋدەن ارتىلمايدى.

«ارينە، بەرىلگەن ساداقانىڭ بۇل دۇنيەدە دە، و دۇنيەدە دە سۇراۋى بولادى. مۇنى كەز كەلگەن يمام جاقسى تۇسىنەدى. ساداقا جاشىكتەرىنىڭ 10 ادامنان قۇرالعان ارنايى كوميسسياسى بار. كوميسسيا قۇرامىندا اقساقالدار، قوعام قايراتكەرلەرى بار. ولار جاشىكتەگى اقشانى ساناپ الىپ، بۋحگالتەرياعا وتكىزەدى. بۋحگالتەريا قاراجاتتى بانككە تاپسىرادى. بانك ارقىلى مەشىتتىڭ كوممۋنالدىق شىعىندارى مەن قىزمەتكەرلەردىڭ ەڭبەكاقىلارى تولەنەدى. ايتسە دە، ءىس جۇزىندە جاشىككە جينالعان قاراجات مەشىت شىعىندارىن وتەۋگە جەتكىلىكسىز»، - دەيدى ول.

سونىمەن بىرگە، ق م د ب وكىلى مامىر ايىندا قۇرىلعان «ۋاقىپ» قورپوراتيۆتىك قايىرىمدىلىق قورىنا ءۇمىت ارتىپ وتىرعاندارىن جاسىرمادى. ءدىن ماماندارىنىڭ بىلىكتىلىگىن كوتەرۋ جانە شالعايدا ورنالاسقان ءدىني بىرلەستىكتەردىڭ الەۋمەتتىك ماسەلەلەرىن شەشۋ - قوردىڭ باستى مىندەتتەرىنىڭ ءبىرى.