سولتۇستىك قازاقستاندا ەسكى زاماننىڭ زەڭبىرەگى تابىلدى - فوتو، كەسكىن

پەتروپاۆل. قازاقپارات - پەتروپاۆل قورعانىنا قويىلعان زەڭبىرەكتىڭ وقپانى ءدامحانا عيماراتىن بۇزۋ كەزىندە تابىلعان، دەپ حابارلايدى «قازاقپارات» ح ا ا ءتىلشىسى.

ءدامحانا قازىرگى ۋاقىتتا كۇردەلى جوندەۋ جۇرگىزىلىپ جاتقان مادەنيەت جانە دەمالىس ساياباعىندا ورنالاسقان. بۇرىن بۇل جەردە جاپپا بولاتىن. ۇڭگىر مەن زەڭبىرەك پەتروپاۆلدىق ساياباقتا قازان توڭكەرىسىنەن بۇرىن اكەلىنگەن. 2000 -جىلداردىڭ باسىندا ۇڭگىردىڭ ورنىنا ءدامحانا تۇرعىزىلىپ، قالالىقتار ەسكى ارتەفاكت قۇرىپ ءبىتتى دەپ ەسەپتەگەن.

ايتا كەتەرلىگى، ءدامحانانىڭ اتاۋى دا وسى جايعا بايلانىستى «زەڭبىرەگى بار ءدامحانا» دەپ اتالعان ەدى. «زەڭبىرەكتىڭ تاريحى ءۇشىن تاقىم قىسقاندارعا جاقسى جاڭالىق دەپ ايتساق تا بولادى. ول تۋرا ورنالاستىرىلعان جەرىنەن تابىلدى. ارتەفاكتتىڭ كەيىنگى تاريحى شىنىندا دا قىزىق. ەسكى زەڭبىرەكتىڭ وقپانى مەتاللولومعا ءوتىپ كەتپەي، تاريحي- ايماقتىق مۋزەيگە ورنالاستىرىلسا دەپ تىلەيمىز»، - دەيدى Fasebook قولدانۋشىلارىنىڭ ءبىرى.

قالانىڭ بۇرىنعى تۇرعىندارى بىرنەشە بۋىننىڭ ۇڭگىر مەن زەڭبىرەكتى قۇندى جادىگەر دەپ ەسەپتەگەنىن ايتادى. ساياباقتىڭ كۇردەلى جوندەۋ جوسپارىندا ۇڭگىر جوق. قالالىقتار تىم بولماعاندا زەڭبىرەك ساقتالىپ قالسا دەپ تىلەك بىلدىرەدى.

سولتۇستىك قازاقستان وبلىسىنىڭ تاريحي- ايماقتىق مۋزەيى ديرەكتورىنىڭ ورىنباسارى ەركىن شاۋكەنوۆ ارتەفاكت ءبىر اپتانىڭ ىشىندە مۋزەيدىڭ ارحيۆىنە تاپسىرىلاتىنىن حابارلادى. «ءبىزدىڭ مۋزەيدە ەكى زەڭبىرەك بار. بۇل دا ساقتالاتىن بولادى. ءوز تاراپىمىزدان قالا تۇرعىندارى مەن قوناقتارى ءۇشىن ەكسپوزيتسيانى قالاي ىڭعايلى ورنالاستىرۋ جاعىن ويلاستىرامىز»، - دەيدى ەركىن شاۋكەنوۆ.

اۆتور: ايان بەكەن ۇلى