ەۆرەيلەردىڭ كوپ جالاقى الاتىنىن جازعان بريتاندىق جۋرناليست جۇمىستان قۋىلدى

بريتانيالىق Sunday Times گازەتى كولۋمنيست كيەۆين مايەرستىڭ بۇدان بىلاي بۇل باسىلىمعا ماقالا جازبايتىنىن حابارلادى. بۇعان ونىڭ ءبىر ماتەريالىندا انتيسەميتيزمنىڭ كورىنىس تابۋى سەبەپ بولعان كورىنەدى.

قازىر ماتەريال گازەتتىڭ ۆەب-سايتىنان الىنىپ تاستالدى. گازەتتەگى ءوز باعانىندا «كەشىرىڭدەر، قىزدار - مۇنداي جالاقى ءۇشىن سوعان ساي ەڭبەك ەتۋ كەرەك» دەگەن تاقىرىپپەن ماقالا جاريالاعان كيەۆين مايەرس BBC-ءدىڭ جۇرگىزۋشىلەرى كلاۋديا ۋينكلمان مەن ۆانەسسا فەلتستىڭ جوعارى جالاقىنى ەۆرەي بولعانى ءۇشىن الىپ وتىرعانىن مەڭزەيدى.

Times وكىلدەرى اۆتوردىڭ بۇدان كەيىن اتالعان گازەتكە ماقالالارى شىعارىلمايتىنىن راستادى. رەداكتور مارتين يۆەنس بولسا وسى جاريالانىم ءۇشىن وقىرماندارىنان، سونداي-اق ول ماقالادا اتتارى اتالعان ايەلدەردەن دە كەشىرىم سۇرادى.

دەرەككوزىنىڭ حابارلاۋىنشا، كەشىرىمنىڭ ءماتىنى گازەت بەتىندە كەلەسى اپتادا جاريالانباقشى. اتالعان ماقالادا كيەۆين مايەرس كورپوراتسياداعى جالاقىسى جوعارى «جۇلدىز» قىزمەتكەرلەردىڭ (جىلىنا 150 فۋنت ستەرلينگتەن كوپ جالاقى الاتىن قىزمەتكەرلەر) ۇشتەن ەكىسى ەرلەر ەكەنىن جازعان.

سونىمەن قاتار، ەڭ جوعارى جالاقىنى الاتىن ەكى قىزمەتكەر - ۋينكلمان مەن فەلتستىڭ ەۆرەي ەكەنىن، ەڭبەكاقىنى كوبىرەك الۋىنا وسى ماسەلە اسەر ەتىپ وتىرعانىن يشارالاي جەتكىزەدى.

وسىدان كەيىن بريتانيانىڭ «انتيسەميتيزمگە قارسى كامپانيا» كوممەرتسيالىق ەمەس ۇيىمى Ipso جۋرناليستىك ستاندارتتاردىڭ تاۋەلسىز ۇيىمىنا وسى ماقالاعا قاتىستى شاعىم تۇسىرگەن.