سەلفي ءسان بە الدە تاۋەلدىلىك پە؟

ولاردىڭ ءوزىن-ءوزى سۋرەتكە تۇسىرۋگە نەگە قۇمار ەكەندىگىن انىقتاۋ ءۇشىن قازاقپارات ءتىلشىسى «SelfieFestKZ» فەستيۆالىنە باردى.

سەلفيدىڭ سانگە اينالعانىنا 5 جىل بولدى. 2015-جىلى تەلەفوننىڭ فرونتالدى كامەراسى ارقىلى ءوزىن-ءوزى سۋرەتكە ءتۇسىرۋ ءادىسى ءالى كۇنگە دەيىن وزەكتى بولىپ تۇر.

بۇگىندە باي-باعلان دا، كەدەي دە، جۇلدىزدار دا، پرەزيدەنتتەر دە سەلفي جاسايدى. الماتى - ەلىمىزدىڭ مادەني استاناسى رەتىندە الەمدىك تەندەنتسيالاردان ارتتا قالعان ەمەس.

الماتىلىق ارۋلاردىڭ اراسىندا سەلفي جاساماسا ءبىر كۇن تۇرا المايتىندار جەتەرلىك.

«مەن كۇندە سەلفي تۇسىرەمىن. تاڭەرتەڭ، تۇستە، كەشكە. مەن ءۇشىن بۇل مىندەتتى پروتسەسس. ارينە، ۇنەمى ساپالى سۋرەت تۇسىرۋگە مۇمكىندىك بولا بەرمەيدى. ال، سەلفيدى كەز- كەلگەن جەردە كەز-كەلگەن تەلەفونمەن تۇسىرۋگە بولادى. ىڭعايلى»، - دەدى ءمادينا قۇرامبايەۆا.

سەلفي تۇسىرگىش ادام سىرتتان ءوزىمشىل ادام بوپ كورىنەتىنى راس. الماتىلىق قىزداردىڭ ءبارى جاپپاي سەلفيلەتكىش ەمەس. كەي ادامدار سۋرەتكە تۇسىرەتىن ادام جوق بولعان كەزدە امال جوقتا پايدالانىلاتىن ءۇردىس دەپ سانايدى.

«مەنىڭ ينستاگرامداعى اككاۋنتىمدا سەلفي مەن جاي سۋرەتتەر ارالاس. مۇمكىندىك بولىپ جاتسا مەن بىرەۋگە تۇسىرتكەندى قالايمىن»، - دەدى ايگەرىم قونايەۆا.

«مەن سەلفيدى تەك سنەپچاتتا جاسايمىن. ءوزىمنىڭ ءتۇرىم قالاي وزگەرگەنى قىزىق»، - دەدى نايليا ەسىمدى بويجەتكەن.

ەگدە ادامدار اراسىندا سەلفي تۇسىرۋگە جاپپاي قۇمارلىق جوق. «ءبىز ءسان قۋاتىن ۋاقىتتان ءوتىپ كەتتىك. نەگىزىندە اينالانى سۋرەتكە تۇسىرگەندى جاقسى كورەمىز»، - دەدى ەلەنا بەلسكايا.

پسيحولوگيا عىلىمدارىنىڭ دوكتورى مادينا بايانبولوۆا سەلفيگە اۋەستىكتىڭ ادام پسيحولوگياسىنا قانداي ىقپالى بار ەكەندىگىن ايتىپ بەردى.

«سەلفيدىڭ ادام دەنساۋلىعىنا ەش زيانى جوق. ەگەر ول ونەر ءۇشىن جاسالسا. ودان وزگە بولسا، تۇسىنىكسىز تاۋەلدىلىككە اينالىپ كەتۋى مۇمكىن»، - دەدى ول.