وزبەكستاننىڭ بۇرىنعى پرەزيدەنتىنىڭ قىزى - گۇلنار كارىموۆا تۇتقىندالدى

وزبەكستان باس پروكۋراتۋراسى تاراتقان اقپاراتتا 2013-جىلدىڭ 24- قازانىندا «Terra Group» ج ش ق، «Prime Media» ج ش ق، «Gamma Promotion» ج ش ق قىزمەتىنەن سالىق تولەۋدەن جالتارۋ فاكتىسى قويىنشا قىلمىستىق ءىس قوزعالعاندىعى اتالىپ وتىلگەن.

«اتالعان قىلمىستىق ءىستى تەرگەۋ بارىسىدا كارىموۆا گۇلنور يسلام قىزى، 1972-جىلى دۇنيەگە كەلگەن، فەرعانا وبلىسىنىڭ تۋماسى، وزبەك، ءبىلىمى جوعارى، مىنا مەكەنجايعا تىركەلگەن تاشكەنت قالاسى، ياشناباد اۋدانى يا. گۋلياموۆ كوشەسى 77 «ا» ۇيىندەگى ساياسي زەرتتەۋلەر ورتالىعىنىڭ ديرەكتورى 2001-2012-جىلدارى ن. سوديكوۆ، ال 2013-جىلدىڭ قاڭتار- قازانىندا ر. مادۋماروۆ جەتەكشىلىك ەتكەن ۇيىمداسقان توپتىڭ قىلمىستىق ارەكەتتەرىنە تىكەلەي جاردەم بەرىپ وتىرعان»، - دەلىنگەن حابارلامادا.

ۆەدومستۆو اقپاراتىنا سايكەس كارىموۆانىڭ باقىلاۋىمەن جانە جاردەمىمەن ۇيىمداسقان قىلمىستىق توپتىڭ مۇشەلەرى 2001-2013-جىلدار ارالىعىندا ءبىرقاتار قىلمىس جاساعان. ونىڭ ىشىندە بوپسالاۋ ارقىلى ازاماتتار مەن كاسىپكەرلەردەن قارجى-قاراجاتتاردى، اكتسيالار مەن ۇلەستەرى جانە مۇلىكتىك نىسانداردى يەلەنۋ، مەملەكەت مۇلكىن يەمدەنۋ جانە تالان-تاراجعا سالۋ ارقىلى ۇرلاۋ، سالىق تولەۋدەن جالتارۋ، قىلمىستىق جاۋاپكەرشىلىكتەن جالتارۋ ماقساتىندا ۇيىمداسقان توپتىڭ باقىلاۋىنداعى شارۋاشىلىق سۋبەكتىلەرى مەن وففشورلىق كومپانيالاردىڭ قىزمەتىمەن بايلانىستى قۇجاتتاردى جويۋ، ءبۇلدىرۋ، جاسىرۋ قىلمىستارى بار.

اتالعان قىلمىس بەلگىلەرى بويىنشا كارىموۆاعا وزبەكستان قىلمىستىق كودەكسىنىڭ بىرنەشە بابى بويىنشا ايىپ تاعىلدى. تاشكەنت وبلىستىق قىلمىستىق ىستەر جونىندەگى سوتىنىڭ 2015-جىلعى 21- تامىزداعى ۇكىمىمەن كارىموۆا جوعارىداعى قىلمىستارعا كىنالى دەپ تانىلىپ، وعان 5 جىلعا باس بوستاندىعىنان ايىرۋ جازاسى بەلگىلەنگەن.

دەگەنمەن، كارىموۆاعا قاتىستى قىلمىستىق ءىس ۇيىمداسقان قىلمىستىق توپقا جاردەمدەسۋ فاكتىسى بويىنشا جەكە وندىرىسكە الىنىپ، قىلمىستىق ءىستى تەرگەۋ جالعاسۋدا.

ولاردىڭ قاتارىندا وزگەنىڭ مۇلكىن يەلەنۋ، شەتەلدىك ۆاليۋتانى جاسىرۋ، كەدەن زاڭناماسىن بۇزۋ، ساۋدا مەن قىزمەت كورسەتۋ ەرەجەسىن بۇزۋ، جالعان قۇجاتتار جاساۋ جانە ولاردى ۇيىمداسقان قىلمىستىق توپتىڭ قىلمىسىن زاڭدى ەتىپ كورسەتۋ ءۇشىن پايدالانۋ، قىلمىستىق جولمەن الىنعان كىرىسىن جىلجىمايتىن مۇلىكتەر ساتىپ الۋ ارقىلى زاڭداستىرۋ، ۇيىمداسقان قىلمىستىق توپپەن وففورلىق كومپانيالار اراسىندا جالعان كەلىسىمشارتتار جاساسۋ ارقىلى اقشا قاراجاتتارىن اۋدارۋ سىندى قىلمىستار بار.

اتالعان فاكتىلەر بويىنشا كارىموۆاعا وزبەكستان قىلمىستىق كودەكسىنىڭ 6- بابى بويىنشا ايىپ تاعىلدى جانە تۇتقىنعا الۋ تۇرىندەگى شارا قابىلداندى. جوعارىدا اتالعان قىلمىستىق ىستەر بويىنشا مەملەكەت پەن ازاماتتاردىڭ مۇددەسىنە كەلگەن شىعىننىڭ جالپى سوماسى ميلليارد دوللاردان اسىپ جىعىلادى. تەرگەۋ ماتەريالدارىنا سايكەس 12 شەت مەملەكەتتىڭ اۋماعىندا قىلمىستىق توپتىڭ زاڭداستىرىلعان اكتيۆتەرى بار ەكەندىگى بەلگىلى بولىپ وتىر.

«شەت مەملەكەتتەردىڭ قۇزىرەتتى ورگاندارىمەن حالىقارالىق ىنتىماقتاستىق اياسىندا تەرگەۋ ورگاندارى ۇيىمداسقان قىلمىستىق توپتىڭ جوعارىدا اتالعان اكتيۆتەرىن تۇتقىنداۋ تۋرالى قاۋلى جىبەردى. قازىرگى ۋاقىتتا قىلمىستىق توپتىڭ وزگە دە اكتيۆتەرىن انىقتاۋ جانە ولاردى وزبەكستانعا قايتارۋ بويىنشا جەدەل تەرگەۋ شارالارى جالعاسۋدا»، - دەلىنگەن تاراتىلعان اقپاراتتا.