اقتوبەدە كامەلەتكە تولماعان قىز ءۇش ءسىڭىلىسىن ءوزى باعىپ وتىر - فوتو

اقتوبە. قازاقپارات - اقتوبەدە كۇلجۇمىروۆتار وتباسىنىڭ ءتورت بالاسى ءبىر-بىرىنە سۇيەۋ بولىپ وتىر.

اكەسى ماحمۋد كۇلجۇمىروۆ تاڭنان كەشكە دەيىن جۇمىستا، دەپ حابارلايدى قازاقپارات ءتىلشىسى. باقىلاۋسىز، قاراۋسىز قالعان بالالاردى وتباسىنىڭ ۇلكەن قىزى اقەركە قارايدى، اراسىندا وعان وزبەكستاننان ۋاقىتشا كەلگەن اجەسى ءتىللاحان ىرزابايەۆا جاردەم كورسەتەدى.

اقتوبە وبلىسىنا وزبەكستاننان قونىس اۋدانعان كۇلجۇمىروۆتار وتباسى قازىر جالدامالى پاتەردە تۇرىپ جاتىر.

كىشكەنتاي بولمەدە ءتورت قىز بەن ولاردىڭ اكەسى ماحمۋد كۇلجۇمىروۆ تۇرىپ جاتىر.

«بالام اقتوبەدە جۇمىس ىستەپ، كەيىن وسى جاققا قونىس اۋدارۋعا شەشىم قابىلدادى. ۇيلەندى، ءتورت قىزى بار. كەلىنىم ساودات كۇلجۇمىروۆا دا كەلىپ، ساۋدا جاساپ، ءبىر ادامدارعا قارىز بولىپ قالدى. ساۋداسى جۇرمەدى، وتباسىندا داۋ-جانجال بولدى. ول وزبەكستان ازاماتى بولعان سوڭ سول جاقتا قالىپ قويدى. سودان بەرى 2 جىلعا جۋىق ۋاقىت ءوتتى. قىزدار اناسىن كورمەدى. كىشكەنتايى جانات قازىر 5 جاستا. ول ساعىنىشىن بىلدىرمەيدى، ءبارى ىشتەن تىنىپ ءجۇر»، - دەدى ءتىللاحان كۇلجۇمىروۆا.

بۇل وقيعا تۋرالى اقتوبە قالالىق اكىمدىگى بىلەدى. ءتىپتى قالالىق ەلەك پوليتسيا ءبولىمىنىڭ كامەلەتكە تولماعاندار ءىسى جونىندەگى ينسپەكتورى، №8 -ورتا مەكتەپكە جاۋاپتى گۇلنۇر الدانوۆا ورالمان ماحمۋد كۇلجۇمىروۆتىڭ بارلىق قۇجاتتارىن جيناپ، وزبەكستاننىڭ قازاقستانداعى ەلشىلىگىنە جولدادى.

«ءبىز بۇل وتباسىمەن تىعىز بايلانىستى جۇمىس ىستەيمىز. وتاعاسى ماحمۋد كۇلجۇمىروۆتا ەكى ەلدىڭ دە قۇجاتى بولمادى. ول جاڭا كۋالىك الۋ ۋاقىتىن وتكىزىپ الىپ، وسى كۇنگە دەيىن ءتولقۇجاتسىز جۇرە بەرگەن. بارلىق قاجەتتى قۇجاتتى جيناپ، وزبەكستاننىڭ قازاقستانداعى ەلشىلىگىنە جىبەرۋگە كومەكتەستىك»، - دەدى گۇلنۇر الدانوۆا.

قۇجات 2018 -جىلدىڭ قىس ايلارىندا دايىن بولۋى ءتيىس. قازىرگى ۋاقىتتا بالالار جازعى دەمالىستا ءجۇر. ولاردىڭ تۋۋ تۋرالى كۋالىگى بار. بالالاردىڭ بىرەۋى عانا قازاقستاندا، ۇشەۋى وزبەكستاندا دۇنيەگە كەلگەن.

وتباسىنىڭ ۇلكەنى، ءارى اقىلدىسى اقەركە بيىل 5-سىنىپقا كوشتى. ۇزدىك، العىر وقۋشى ءسىڭلىسى اسەمگۇلگە العاش ءارىپ ۇيرەتىپ، الىپپەنى وقىتتى. ەسەپ شىعارۋدىڭ جولدارىن ءتۇسىندىرىپ، كوبەيتۋ كەستەسىن جاتتاتتى.

«سىڭلىلەرىمە قارايلاسىپ، ولاردى ساباققا دايىندايمىن. قازىرگى كەزدە 1-سىنىپقا باراتىن ءسىڭلىم ايسۇلۋعا ءارىپ ۇيرەتىن جاتىرمىن. ول قوسۋ امالدارىن بىلەدى. ءارىپتى دە تانيدى. الداعى ۋاقىتتا وعان قامقور بولىپ، ساباققا بىرگە دايىندالامىز. ءوزىم دە جاقسى وقيمىن. تەك ورىس ءتىلىن مەڭگەرۋ قيىنعا سوعىپ تۇر»، - دەدى اقەرەك كۇلجۇمىروۆا.

ول ءبي بيلەگەندى ۇناتادى. سپورتقا دا اۋەس. ال اسەمگۇل گيمناستيكامەن شۇعىلدانىپ ءجۇر. ءبارىن ءوزى ۇيرەنىپ الدى.



ءۇيدىڭ كەنجەسى جانات كۇلجۇمىروۆا قازىر 5 كۇندىك بالاباقشادا. بۇل كومەكتى جەرگىلىكتى بيلىك كورسەتتى. تەگىن بالاباقشادا جانات كۇلجۇمىروۆ اپاسى ايسۇرۋمەن بىرگە تاربيەلەنگەن بولاتىن. ەندى ءبىر ءوزى باقشاعا بارادى.

«كىشكەنتايىمىزدى اناسى 3 جاسىندا تاستاپ كەتتى. بالا بولعان سوڭ ساعىنادى، اكەسىنىڭ جانىنان قالمايدى. جۇرەگىمىز ەزىلگەنىمەن، قولدان كەلەر كومەك جوق. اكەسى وزبەكستانعا قايتا ورالعىسى كەلمەيدى. ول ءتورت قىزىن دا ءوزى باعىپ-قاعامىن دەپ وتىر. مەن دە وزبەكستان ازاماتىمىن. اۋىلعا بارىپ، ۋاقىتشا قۇجات مەرزىمى بىتكەن سوڭ ۇيىمە بارىپ، كەلىپ ءجۇرمىن. سول كەزدە كورشىلەرگە نەمەرەلەرىمدى امانات ەتىپ كەتەمىن، بالام قارايدى. بىزگە كومەك كەرەك. قىزدار مەكتەپكە بارادى، ولارعا ارنايى فورما تىكتىرۋ كەرەك. وقۋ قۇرالى دا جوق. كيىمدەرىن الاتىن قارجى تاپپاي وتىرمىز»، - دەدى وتباسىنىڭ اجەسى.

ورالماندار اقتوبەگە 6 جىل بۇرىن قونىس اۋداردى. قۇجاتتارى رەتتەلمەگەن سوڭ ولار ارنايى كۆوتا الا المادى. قازىر بالالارىنا دا مەملەكەتتىك جاردەماقى تولەنبەيدى. ال ماحمۋد كۇلجۇمىروۆتىڭ جالاقىسى پاتەراقى مەن وتكەن جىلداردىڭ قارىزىن وتەۋدەن اسپايدى. كامەلەت جاسقا تولماعان بالالار بولسا تويىپ تاماق ىشپەيدى، ءتاتتى سۇرامايدى...

اۆتور: التىناي ساعىندىقوۆا