بەلگىسىز بىرەۋلەر ءمينيستردى ۇرلاپ كەتتى
استانا. قازاقپارات - داعىستاندىق ءمينيستردى ۇرلاپ كەتكەن ماحاچكالانىڭ ەكى تۇرعىنى ءتارتىپ ساقشىلارىنىڭ قولىنا ءتۇسىپ، شەنەۋنىك بوساتىلعان.
بۇل تۋرالى ينتەرفاكس باسىلىمى حابارلايدى.
«ۇيىمداسقان قىلمىستىق توپپەن بىرگە ادام ۇرلاپ، زورلىق-زومبىلىق كورسەتكەن، سونداي-اق، زاڭسىز قارۋ پايدالانعانى ءۇشىن كۇدىكتىلەردىڭ ۇستىنەن قىلمىستىق ءىس قوزعالدى»، - دەلىنگەن رەسەي تەرگەۋ كوميتەتىنىڭ باسپا ءسوز قىزمەتى تاراتقان حابارلامادا.
20- شىلدە كۇنى داعىستان رەسپۋبليكاسىنىڭ ارحيتەكتۋرا جانە قۇرىلىس ءمينيسترىن بەلگىسىز بىرەۋلەر تاپانشامەن قورقىتىپ، ۇرلاپ كەتەدى. ولار بەلگىلى شەنەۋنىك ءۇشىن ءىرى كولەمدەگى اقشا تالاپ ەتۋدى كوزدەگەن.
ۆەدومستۆو ءمينيستردىڭ اتى-ءجونىن اتاماعانمەن، مينيسترلىك سايتىنىڭ اقپاراتىنا سۇيەنسەك، داعىستاننىڭ قۇرىلىس ءمينيسترى يبراگيم كازيبەكوۆ ەكەن.
«كەلەسى كۇنى قاراقشىلار سۇراعان اقشانىڭ 30 ميلليون رۋبل كولەمىندەگى بولىگىن بەرۋ ۇستىندە قىلمىسكەرلەر ارنايى ورگان قىزمەتكەرلەرىنىڭ قولىنا ءتۇستى»، - دەيدى باسپا ءسوز قىزمەتى.
